विजयरत्न असंबरे

थौंकन्हे नेवाःफिल्म दयेकीपिं अप्वःया वःगु दु । नेवाःफिल्मय् तइगु लाय् नं अप्वया वःगु दु । थगुनेनगुने तकसा नेवाः फिल्मया बजेट झिगुलख तका धका धाल की हे बीग बजेट धका धाइगु खःसा आः थूगुसी बजेटया थ्वः पःखाः झंझं तजाः जुया वःगु दु । छखे  “च्वापुफय्” या बजेट स्वंगु करोडतका धका धालसाः आः वया नेवाः फिल्म ख्यःया छम्ह नांजाम्ह निर्देशक आर्यम नकःमिं दयेका च्वंगु  “लाखे भाजु”या बजेट न्येय्गु लख थ्यनिगु जूगु दु धका बय्बय् जुया च्वंगु दु । “च्वापुफय्” फिल्मय् सनिश शाक्य , निकि महर्जन , राजेन्द्रमान शाक्य लगायत आपालं कलाकार तय्गु भुमिका दइगु जूगु दुसाः थुकीयात नेपालभाषाया मल्टी स्टारर फिल्मया रुपय् चर्चा यानातःगु दु । “कीर्तिपुर ः द लिजेण्ड अफ कीर्तिलक्ष्मी” फिल्मया निर्देशक प्रदिप खड्गीया निर्देशनय् दयेका च्वंगु “च्वापुफय्” या छुंछुं अंशया शुटिंग चीनया ल्हासाय् क्वचायेके धुंकूगु दु । थज्यागु थीथी कारणं याना थ्व फिल्म बीग बजेट फिल्म जूवंगु खः ।

 थ्वसिबें न्हापा सञ्चारकःमि समीर बलामिं निर्देशन याइगु धका धाःगु “आ...छु याये” या बजेट नं अथे हे पीगु ÷न्येय्गुलख तका तुइ धका नाय्खिं च्वयेके धुंकूगु दु । आः थनथाय् लाक्क धाय्गु खःसा “लाखे भाजु” व “च्वापुफय्” या विषय बस्तु धइगु नेपाःया इतिहासलिसे स्वापु दूगु पुलांगु बाखँ न्ह्यब्वय्माःगुलिंजक मखसे थुकिया क्यानभास हे तधं जुइगुलिं थुकी लाय् अप्वः तुइगु स्वाभाविक खः अले  “आ...छु याये” या लाय् धाःसा थुकी छ्यलिगु प्रविधी व म्हितिपिं कलाकारतय्गु हुनिं अप्वः तुइगु खँ पिहाँ वया च्वंगु दु । थुके नेपाःया फिल्मख्यलय् नांजाम्ह हिरो कर्मा नं म्हितिगु खँ दु । वयागु निंतिंजक न्यागुनिसें च्यागुलखतका दाँ ज्याला पुलेमालिगु खँ दु ।

 “लाखे भाजु” या निर्माणय् लोकंह्वाम्ह हिरोइन् आशिष्मा नकःमिं ल्हाः तःगुलिंजक मखसे थुके नेपाःया फिल्म ख्यःया नांजाःपिं बञ्जाःत प्रदिपकुमार उदय , गोपालकाजी कायस्थ व नरेन्द्र महर्जन थेंँज्यापिन्सं नं लाय् तइगु कारणं याना नं बय्बय् जुया च्वंगु खः । थ्व फिल्मय् आशिष्माया हिरो कथं सोहित मानन्धर खनेदइसा थुके सुरज व्यञ्जनकार , रुपेन श्रेष्ठ , मदनदास श्रेष्ठ , नगीना जोशी , गणेशराम लाछीया नापनापं ख्यालिजुजुया रुपय् नांजाम्ह कलाकार मदनकृष्ण श्रेष्ठयात नं स्वय्दइगु जूगु दु । नेपाःया तःजिगु नखः ञयाबले पिहाँ वइम्ह मजिपा लाखेया ऐतिहासिक बाखँ ज्वना पिलूवय्त्यंगु नेवाः फिल्म थ्व जक मखु मेगु नं दु । अले मेगु फिल्मया नां “मजिपा लाखे” खः । थ्व एनिमेशन प्रविधी दयेका च्वंगु फिल्म खः । थ्व फिल्मया निर्देशक संयुक्त श्रेष्ठं थ्वसिबें न्हापा एनिमेशन प्रविधी हे छ्यला “शंखधरया बाखं” नांयागु छगु फिल्म दयेके धुंकूगु दुसाः उगु फिल्म नगुने तिनि पिदंगु खः ।

थगुने यक्वः हे नेवाः फिल्मया मुहुर्त व शुटिंग न्ह्याःगु खनेदत । उकी मध्ये छगू धइगु राजेशमान सिंहया निर्देशनय् दयकेत्यंगु “लिबाय् धुंका” नांयागु छगु फिल्म नं खः । थ्व फिल्मया  शुटिंग शुरु याय् न्ह्यः कलाकार व प्राविधिक मुना वर्कशप नं याःगु खः । थथे नेवाः फिल्मया ख्यलय् वर्कशप धाइगु म्होजक याः । “मू मदुगु जिन्दगी” फिल्मय् हिरो जुया म्हितुम्ह आर एल महर्जन हाकनं छक्वः “लिबाय् धुंका”फिल्मय् हिरो जुया म्हितिगु जूगु दुसाः थुके आराध्यलक्ष्मी खडगी हिरोइन् जुया म्हितेत्यंगु दु । आशाकाजी थकु , मञ्जु श्रेष्ठ , नारायणदेबी प्रधान , रामराजा भाम , भिमसेन रिसाल , मोहिद्दीन खान , कुमार कार्की व उत्तम खत्री थ्व फिल्मया मेन कलाकारपिं खः ।

अथेहेतुं निर्देशक पवन जोशीया  “बसन्त ऋतु” नं थगुने  हे शुटिंग न्ह्याःगु फिल्म खः । थुके अनु महर्जन , किशोर चिपालु , शोभा महर्जन , राजी किपु थेंज्यापिं आपालं कलाकारया मेन रोल दु । न्हापा छम्ह निर्माताया रुपय् खनेदय्क वःम्ह सुरेश खडगी आः छम्ह निर्देशकया रुपय् नं खनेदइगु जूगु दुसाः सुरेश खडगीं दयेकेत्यंगु “मां” फिल्मय् नेपालभाषाया साहित्य ख्यलय् न्हापांम्ह मिसा उपन्यासकार कथं कयाःतःम्ह शशीकला मानन्धरं मां जुया म्हितिगु जूगु दु । थुके लोकंह्वाम्ह हिरोइन् भिन्तुना जोशीं नं छम्ह हिरोइन् जुया म्हितिगु जूगु दुसाः वलिसे किशोर शाहीया जोडी दइगु थ्व फिल्मय् सञ्जु खडगी व रजनी खडगीया नं जोडी दई ।
थूगुसी नेवाः फिल्म ख्यलय्  न्हूपिं निर्देशकत नं खनेदय्क वय्त्यंगु दु । थथे निर्देशनय् पलाः न्ह्याकेत्यंपिं मध्ये भाजु पूर्णकाजी ज्यापु नं खः । पूर्णकाजी ज्यापु व अनुज महर्जन जाना निर्देशन याना च्वंगु “हिसिमति” फिल्मय् निकी महर्जन हिरोइन्या रुपय् म्हिता च्वंगु दुसाः थुके योगेन महर्जनं हिरो जुया म्हिता च्वंगु दु । अथेहेतुं थूगुसी खनेदय्क वय्त्यंम्ह मेम्ह निर्देशक राजेन्द्रमान शाक्य नं खः । राजेन्द्रमान शाक्यं दय्का च्वंगु नेवाः फिल्मया नां “रश्मी” खः । नगुने हे शुटिंग शुरुयाःगु थ्व “रश्मी”फिल्मयात आशिष्मा नकःमिया नेवाः फिल्मय् कमब्याक जुइगु फिल्मया रुपय् बय्बय् यानातःगु फिल्म खः ।  नेवाः फिल्म ख्यःया हिसिदुम्ह हिरो धका धयातःम्ह राजु महर्जन नं कमब्याक जुइत्यंगु थ्व फिल्मय् सुरज व्यञ्जनकारया नं मेन रोल दु ।

अथेहेतुं थूगुसी पिदनिगु छगु फिल्मय् “वाःया दुने जाकी दु” नं ला । थ्व फिल्मया निर्देशक बाशु शाही खः । ब्या यायेम्हा , एक से एक , तानाज्यो थेंज्यागु आपालं फिल्म दयेका नेवाः फिल्म ख्यःया नन्स्टप निर्देशक धायेकेत ताःलाम्ह बाशु शाहीया थ्व फिल्मया शुटिंग क्वचाय् धुंकूगु दुसाः थौंकन्हे एडिटिंगया ज्या न्ह्याना च्वंगु दु । तर थ्व फिल्मया बारे मेगु खँ धाःसा पितब्यूगु मदुनि ।

थूगुसी पिदनिगु नेवाः फिल्मय् छगु अतिकं बय्बय् जुया च्वंगु फिल्म धइगु “जामन गुभाजु” खः । नेवाः तजिलजिं जाःगु थ्व फिल्म नेवाःत दथुइ तसकं लोकंह्वाःगु पुलां बाखंनय् आधारित फिल्म खः । मल्ल कालिन जुजुया पालय्या थ्व बाखं धइगु नेपाःया नांजाम्ह तान्त्रिक गुभाजुया बारेया बाखं खः । थ्व फिल्मया निर्देशक रवि सायमि खःसा थुके सुशील राजोपाध्यायं जामन गुभाजुया मेन रोल म्हिता तःगु दुसाः थुके पुष्कर माथेमा , सुरज व्यञ्जनकार , अमिता जोशी , अन्नपूर्णेश्वरी श्रेष्ठ , संघरत्न शाक्य थेंज्यापिं आपालं कलाकारतसें थीथी भुमिकाय् अभिनय याना तःगु दु । दक्वं शुटिंग क्वचाय् धुंकूगु थ्प फिल्मया थौं भिजुअल ईफेक्टया ज्या जुया च्वंगु दु । थुकथं थ्व दँ नेवाः फिल्म ख्यःया निंतिं छगू बिस्कं हे महत्वया दँ जुइगु पक्का जूगु दु ।