zero media family planning adv

छुवाछुत सम्बन्धी जघन्य घटनाया अपराधीयात कानूनी दायराय् हयेगु जुइ : प्रम ओली

नेवा: अनलाइन न्युज | २०७७ जेठ २१, बुधबार १०:५७:५२

प्रधानमन्त्री केपी शर्मा ओलीं छुवाछुतथें जाःगु जघन्य हिंसाय् शून्य सहनशीलता छ्यलेगु धाःगु दु । छुवाछुत सम्बन्धी जघन्य घटनाया अपराधीपिन्त कानूनी दायराय् हयेत सरकारं सम्झौता मयायेगु प्रधानमन्त्री केपी शर्मा ओलीं धाःगु दु ।

छुवाछुतविरुद्धया राष्ट्रिय दिवसया लसताय् बुधवाः भिंतुना सन्देश सार्वजनिक यासें प्रधानमन्त्री ओलीं आः नं कथित दलितया हीन पहिचान ब्यहोरे यानाः छुवाछुतय् आधारित जघन्य अपराधया शिकार जुइमालाच्वंगु घटनात जुयाच्वंगु धासें चिन्ता प्वंकूगु दु ।

प्रधानमन्त्रीपाखें सार्वजनिक जूगु सन्देशय् धयातःगु दु, “युगौं न्ह्यःनिसेंया कुप्रथापाखें प्रभावित सामाजि सोचय् दूगु असंवेदनशीलता व गरिबीया हुनिं झी तःकेहेँ दाजुकिजापिं आः नं कथित दलितया हीन पहिचान ब्यहोरे यासें छुवाछुतय् आधारित जघन्य अपराधया शिकार जुइमाःगु घटना झीसं खनाः वयाच्वनागु दु ।”

प्रधानमन्त्रीया सम्बोधनय् धयातःगु दु, “नेपाल सरकारं सामाजिक बहिष्करण, छुवाछुत व उकिया आधारय् जुइगु हिंसाय् शून्य सहनशीलताया नीति अवलम्बन याःगु दु । अर्थात् मानव हितविरुद्धया थुज्वःगु गतिविधियात सरकारं किञ्चित सहयाइमखु । थुज्वःगु अमानवीय हिंसाया घटनातय्गु छानविन यानाः दोषीपिन्त कारवाही यायेत राज्य किञ्चित लिचिली मखु ।”

मानव सभ्यताया कलंक व सभ्य, लोकतान्त्रिक व सम्मानजनक जीवन म्वाये दइगु मानव अधिकारया पालनाय् खनेदूगु बाधातय्त सरकारं चीकेगु धासें प्रधानमन्त्री ओलीं न्ह्यःने धाःगु दु, “छुवाछुत सम्बन्धी जघन्य घटनाया अपराधीपिन्त सरकारं कानूनी दायराय् हयेगु जुइ । थुज्वःपिं अपराधीपिन्त कडासिबें कडा सजाय बिइगु खँय् सरकारं छुं नं सम्झौता याइमखु ।”

Categorized in राजनीति