nepal life 2076 3 18

छुं नं उपाधि क्वःयात हेलमेट पुइकेगुथें मजुइमा : गौरी मल्ल

नेवा: अनलाइन न्युज – ललेन्द्र शाक्य | २०७८ आश्विन ५, मंगलबार १४:२३:५५

नेपाली संकिपा ख्यःया नांजाःम्ह हिरोनी (नायिका) गौरी मल्लं कलाकारपिन्त बिइगु छुं नं उपाधि क्वःयात हेलमेट पुइकेगुथें जुइमज्यूगु लिसः ब्यूगु दु । नेपाली संकिपाया थां कथं कयातःपिं निम्ह हिरो शिव श्रेष्ठ व भुवन केसीं छगू ज्याझ्वलय् गौरी मल्लयात ‘महानायिका’ धाःगु खः । वहे समारोहस उपस्थित जूम्ह गौरी मल्लं धाःगु दु, ‘छुं नं उपाधि धानेयायेफइगु जुइमाः । उपाधिया नितिं उम्ह व्यक्ति लायक नं जुइमाः । उपाधि काइम्ह व्यक्तिं नं उपाधिया नितिं थः लायक जू कि मजू धकाः अन्तरबोध यायेत आवश्यक जू ।’

हिरोनी गौरी मल्लं थःम्हं ज्या सुरु यानाःबलय् उपाधि दइ धैगु आशां ज्या मयानागु तकं स्पष्ट याःगु दु । गौरीं धाःगु दु, ‘जिं ज्या सुरु यानाबलय् छुं उपाधि दइ धकाः यानागु मखु । बुलुहुँ ववं थन वयागु खः । जितः ला थ्व देसय् छुं नं उपाधिया औचित्य दुथें मताः । थन ला उपाधि धयागु छुं नं किपाःयात अंगलय् सजेयानाः पूजा यायेगुथें जक जूगु दु । उकिं, जितः थुज्वःगु उपाधि माःगु नं मदु । झीपिं ज्या याइपिं मनूत खः, झीत ज्या ब्यूसा गाः ।’

गौरी मल्लं थौं न्वःवानागु खँत कन्हयया पुस्ताया नितिं इतिहास जुइगु जूगुलिं सोच विचाः यानाः जक न्वःवायेमाःगु व उपाधि बिइमाःगु धाःगु दु । गौरीं धाःगु दु, ‘झीसं राणाकालय् सुनां सुयात स्यात, मखना । तर, सफू दुने छु च्वयातःगु खः, उकियात स्वीकार याना । राजदरबार हत्याकाण्डय् नं छु न्यना, वहे विश्वास याना ।’

आःया ३० वा ५० दँ लिपाया पुस्तां आः धाःगु खँयात हे मानेयाइगु गौरी मल्लया तर्क दु । गौरीं धाःगु दु, ‘छुं नं श्रृंगार, अलंकार सही मनूयात बिइमाः । प्यम्हेसित लयेतायेकेगु नितिं उपाधि बियां छु यायेगु ? थौं झीसं न्वःवाःगु खं कन्हयया पुस्ताया मनस्थिति हिली । जितः थुज्वःगु खँय् फिटिक्क नं रुची मदु ।’

गौरी मल्लं कलाकारपिन्सं थुज्वःगु उपाधिया ल्यूने जुइगु सिबें नं ज्यां प्रमाणित यायेगुपाखे सोचेयायेमाःगु सुझाब ब्यूगु दु । गौरीं थःम्हं न त जुजुया पाखें न त छुं सरकारया पाखें छुं सम्मान मकयागु धासें न्ह्यस तल, ‘छु जि सम्मानया नितिं लायक जू ला ? पक्का नं जू जुइ । तर, कायेमखंसां नं जितः छुं दुःख मदु । स्वकुमिपिन्सं बिइगु स्नेह हे दकले तःधंगु सम्मान व उपाधि खः ।’

Categorized in कला