नेवा: अनलाइन न्युज | २०७६ जेठ ६, सोमबार १०:०३:४८

वाःका छाय् वल ? छुकिया छाय्, वल धासेंलि वल का । तर पासापिं वाःकाः धयागु अथें हे वइगु चाहिं मखु का । थुकिया लिउने नं वैज्ञानिक कारण दु । वैज्ञानिक तथ्यं जाःगु थुगु जानकारीं छितः वाःकाः वइगुया धाथेंया कारण छु खः धयागु खँ सीकेबी ।
वाःकाः वइगुया दक्वं जैविक कारण सीकेत वैज्ञानिकतय्सं छुं विशेष रुचि क्यंगु मदु । तर इमिसं थ्व छता खँ छप्वाः हे म्हुतुं धाये थें धयाच्वंगु दु कि वाःकाः झीत अबलय् हे जक वइ, गबलय् झीगु सासः ल्हायेगु प्रणालीइ म्वाःमदुगु पंगः वइ । थुकिं झीगु हिया कार्बन डाइअक्साइडया स्तर नियमित जुइ । टेक्निकल हिसाबं धायेगु खःसा ताःहाकयेक सासः दुकायेगु व उकिया लिसेलिसें कार्बन डाइअक्साइड त्वःतेगु क्रियाय् म्हुतु वांखायेगु हे वाःकाः तयेगु खः । धाथें ला वाःकाः छगू सामान्य क्रिया खः । तर बारम्बार वाःकाः वयाच्वन धाःसा थथे धकाः थुइकेमाः कि थुकिया लिउने सतबत क्वँय् व थीथी स्नायु केन्द्रय् लाःवइगु अनावश्यक धक्का खः । शरीरविज्ञानीतय्गु अनुमान दु कि झी त्यानुया च्वनीबलय् व म्हाइपुया–च्वनीबलय् भचा सासः फुं फुं च्वनाच्वनी ।
थज्याःगु अवस्थाय् स्वँयात नुगःस्यें वइगु हिनुलिं अक्सिजन चूलाइगु कम जुयावनी । वाःकाः वइबलय् उम्ह व्यक्तिया सतर्कताया स्तर माक्व स्वयां अप्वयावइ । थुकिया कारण खः, आकाझाकां अक्सिजनया अप्वः मात्रा वयाबिउगुलिं नुगःया धुकधुकी तच्वः जुइगु । थज्याःबलय् स्वँयात आराम दइ । अले हिइ कार्बन डाइअक्साइड अप्वयावइ, गुकिं यानाः हिया माध्यमं अक्सिजन तीव्र गतिं न्ह्यपुइ वनाहइ ।