Header Nepal rastra bank Adv

छम्ह मतदाताया २८४ तका दां खर्च

नेवा: अनलाइन न्युज – ललेन्द्र शाक्य | २०७९ श्रावण ११, बुधबार १२:४४:११

वंगु बैशाख ३० गते क्वचाःगु स्थानीय तह निर्वाचनय् छम्ह मतदाताया २८४ तका दां खर्च जूगु दु । थ्व खर्च २०७४ सालया स्थानीय तह निर्वाचनया सिबें म्हो खः । निगू वा स्वंगू चरणया पलेसा छगू हे चरणय् निर्वाचन याकूबलय् खर्च छुं भच्चा म्हो जूगु खनेदूगु खः ।

संविधानसभा निर्वाचननिसें संघीयता कार्यान्वयन जुइधुंकाःया स्वंगू चुनावया खर्च तुलना यायेबलय् थुगुखुसिया चुनावी खर्च मीतब्ययी खनेदूगु दु । थ्वसिबें न्ह्यः स्वंगू चरणय् स्थानीय चुनाव याःबलय् खर्च अप्वः जूगु खः । निर्वाचन आयोगं सार्वजनिक याःगु तथ्यांक कथं २०७० व २०७४ सालय् जूगु प्रतिनिधिसभा, प्रदेशसभा व स्थानीय तह निर्वाचनय् सिबें थुगुखुसि छुं खर्च म्हो जूगु खनेदूगु दु ।

२०७९ बैशाख ३० गते जूगु स्थानीय तह निर्वाचनय् मुक्कं ५ अर्ब ४ करोड ३ लख ९२ हजार खर्च जूगु दु । निर्वाचनय् १ करोड ७७ लख ३३ हजार ७ सय २३ म्ह मतदाता दूगु खः । फुक्क मतदातायात निर्वाचन खर्च इनेबलय् २८४ तका दां जूवःगु दु । थ्व २०७० सालया संविधानसभाया चुनावसिबें नं म्हो खः ।

थुगुखुसि आन्तरिक स्रोतया खर्चय् जक चुनाव जूगु आयोगं जानकारी ब्यूगु दु । आयोगया कथं प्राविधिक व व्यवस्थापकीय खर्चय् जक वाह्य स्रोत छ्यःगु व ल्यंदूगु आन्तरिक स्रोतपाखें हे याःगु खः ।

स्थानीय तह निर्वाचन २०७९ स ५ अर्ब ४ करोड ३ लख ९२ हजार खर्च जूगु दु । २०७४ सालय् स्वंगू चरणय् स्थानीय तह निर्वाचन जूबलय् ७ अर्ब १५ करोड ७७ लख तका दां खर्च जूगु खः ।

२०७४ सालय् जूगु स्थानीय तह निर्वाचनय् छम्ह मतदाताया ब्वलय् ५०९ तका दां खर्च जूगु खः ।

नागरिक न्हिपौपाखें

Categorized in पत्रपत्रिका