zero media family planning adv

छम्ह कैदी दुगु जेलय् १६९ सुरक्षाकःमि

२०७३ आश्विन २३, आइतबार ११:५४:२८

झीथाय्या जेल असुरक्षित दु, अनया भौतिक अवस्था बांमलाः । जेल व्यवस्थापनय् सरकारं ध्यान मब्यूगुलिं इलय्ब्यलय् जेलं कैदीत बिस्युं वंगु व उमिसं अनया व्यवस्थापन सुधार यायेमाःगु माग यानाः आन्दोलन याःगु बुखँत वयाच्वंगु दु ।
तर जर्मनीया बर्लिनय् छगू थुज्वःगु जेल दु गन छम्ह कैदीया सुरक्षाया नितिं सच्छि व ६९ म्ह सुरक्षाकर्मी खटय् जुयाच्वंगु दुसा वयागु सुरक्षाय् जक थ्यंमथ्यं ११ करोड खर्च जुयाच्वंगु दु । बर्लिनया उगु जेलय् उम्ह कैदीयात कडा सुरक्षाय् तयातःगु दु । वयात कोठा दुने हे जक तयातइ, वयात जेल परिसय् चाःहिलेगु तकं उजं मदु । तर उम्ह मनू उलि यक्व सुरक्षाकःमिं पहरा बीमाःम्ह वा करोडौं खर्च यानाः जेलय् तयेमाःम्ह मनू धाःसा मखु ।
सरकारी व्यवस्थापनया हुनिं उम्ह कैदी उगु जेलय् याकःचा लाःगु खः । जेलया  सुरक्षाया नितिं खटय् जुयाच्वंपिं फुकं सुरक्षाकर्मी व खर्च यथावत जुयाच्वंगु दु । उगु जेलयात बन्द यानाः अन च्वंपिं कैदीतय्त मेगु जेलय् सारे यायेगु थ्वयां न्ह्यःया निर्णययात सरकारं लितकायेवं व याकःचा जूगु खः । सरकारी निर्णयलिपा अन च्वंपिं कैदीपिन्त छम्ह छम्ह यानाः मेगु जेसय् थाय् हिल । तर उगु जेलय् छम्ह जक मनू ल्यं दुगु इल्य् सरकारं निर्णय हिलाबिल । थथे निर्णय हिले धुंकाः वनेधुंकूपिं कैदीतय्त लित हयेगु ज्या मयायेवं जेलय् उम्ह कैदी याकःचा लाःगु व जेलया सुरक्षाय् खटय् जुयाच्वंपिं सुरक्षाकःमिया संख्या व खर्च धाःसा यथावत जुयाच्वंगु खः ।