Header Nepal rastra bank Adv

छन्हुं हे स्वनिगलं पिहाँ वन ८३ हजार यात्रु

नेवा: अनलाइन न्युज – ललेन्द्र शाक्य | २०७९ बैशाख २९, बिहिबार १३:३४:२१

लिपांगु न्यान्हुया दुने जक थ्यंमथ्यं ३ लखसिबें अप्वः मनूतसें सडकमार्ग जुयाः स्वनिगः त्वःतूगु दु । महानगरीय ट्राफिक प्रहरी महाशाखाया कथं बुधवाः चुनावया नितिं भोट कुर्केत वंपिं यात्रुया उच्च चाप जूगु खः । बुधवाः जक ८३ हजार ६६० म्हेस्यां स्वनिगः त्वःतूगुु खः ।

बुधवाः ११ हजार २३३ सवारीं स्वनिगःया थीथी नाका जुयाः स्वनिगः त्वःतूगु खः । चुनाव लिक्क वयेखतं स्वनिगः दुहाँ वइपिनिगु ल्याः म्हो जूगु खःसा पिहाँ वनीपिं यात्रुपिनिगु ल्याः ह्वात्त हे अप्वःगु दु ।

२७ बैशाखय् जक थ्यंमथ्यं ५९ हजार ८१ म्हेस्यां स्वनिगः त्वःतूगु खः । २६ बैशाखय् थ्व ल्याः ५ण् हजार ९३० खःसा २५ गते ५५ हजार ७४६ म्हेस्यां स्वनिगः त्वःतूगु खः । २४ गते ५३ हजार मनूतसें स्वनिगः त्वःतूगु महानगरीय ट्राफिक प्रहरी महाशाखां जानकारी ब्यूगु दु ।

स्वनिगः दुहाँ वइपिनिगुु ल्याः धाःसा छुं दिं थुखे सामान्य अवस्थाया सिबें म्हो जूगु महाशाखां जानकारी ब्यूगु दु । बुधवाः ९ हजार २२१ गः सवारीपाखें ३५ हजार ६५७ म्ह यात्रु स्वनिगः दुहाँ वःगु खः ।

बिहिवाः नं नाकाय् पिहाँ वनीपिं यात्रुपिनिगु चाप जूगु दु । स्वनिगः त्वःतीगु बसय् नं कोचाकोच दथुइ यात्रुपिं छेँय् लिहाँ वंगु दु । स्वनिगलय् हे स्थायी बसोबास यानाच्वंपिं नं भोट कुर्केत गामय् लिहाँ वंगु दु ।

थौं बिहिवाः चान्हय् निसें सवारीसाधन बन्द जुइ ।

Categorized in राष्ट्रिय