नेवा: अनलाइन न्युज – ललेन्द्र शाक्य | २०७७ चैत्र १९, बिहिबार १६:१२:३६

कोरोनाया जोखिमया हुनिं जूगु लकडाउनया ईलंनिसें  नेपालभाषाया संगीत ख्यलय् थीथी कथंया ज्याझ्वः जूगु खःसा लकडाउन धुंकाः नेपालभाषाया म्युजिक भिडियो आपालं पिहाँ वयाच्वंगु दु । थ्वहे झ्वलय् छन्त नापलाये सातकि बोलया छपू म्येया म्युजिक भिडियो बुद्धवाः नेवा एचडी टिभिइ प्रत्यक्ष प्रसारणपाखें छगू औपचारिक ज्याझ्वः याना प्रिमियर जुउगु दु ।

तसकं लोकंह्वाःम्ह म्येहालामि रत्नशोभा महर्जन व सज्जु मानन्धरं हालातःगु थ्व म्येयात जुगल डंगोलं लसय् हनादीगु खः ।

किरण जोशी व नेन्सी महर्जनं मोडल जुया म्हितातःगु थ्व म्युजिक भिडियोया निर्देशन समयबजि, कुचुकुचु, चाकुमाकु थेंज्याःगु नेवाः टिभि प्रोग्रामया लोकंह्वाःम्ह कलाकःमि सुरेन्द्र मानन्धरं यानादीगु खःसा क्यामेरा आयुष महर्जन, सम्पादन ईन्द्र मानन्धरं यानादीगु खः ।

नेवाः एचडी टिभिइ प्रत्यक्ष प्रसारणपाखें प्रिमियर जूगु ज्याझ्वलय् वडा ल्याः १३ या पुलांम्ह वडा सदस्य समाजसेवी दिलबहादुर मानन्धर मूपाहाँ कथं झायादीगु खः । प्रिमियर ज्याझ्वलय् नेपालभाषाया न्हापांम्ह म्युजिक भिडियो निर्देशक विजयरत्न असंबरें प्रिमियर जूगु म्येया समीक्षा यानादिल ।

सुरेन्द्र मानन्धरं न्ह्याकादीगु ज्याझ्वलय् रत्नशोभा महर्जन व सज्जु मानन्धरं म्ये हाला नं न्यंकादीगु खः ।

Categorized in कला