zero media family planning adv

छधा प्याखनय् संकिपा महारथीतय् भिडन्त

नेवा: अनलाइन न्युज – निश्चल | २०७७ आषाढ १५, सोमबार १८:३३:१२

नेपालभाषा एकेडेमीया ग्वसालय् ने सं ११४० दिल्लाथ्व दशमि, असार १६ गते  छगु छधा प्याखं ब्वज्या जुइगु जुउगु दुसाः थ्व ब्वज्याय्  नेवाः संकिपा ख्यःया महारथी दथुइ भिडन्त जुया च्वंगु दु ।

थ्व ब्वज्याय् नेवाः संकिपा ख्यःया नांजापिं निर्देशकत पवन जोशी, आर्यम नकःमि, सुरेन्द्र तुलाधर, राजु स्यस्य व रामकृष्ण खड्गीया नापनापं नेवाः संकिपा ख्यःया व्यस्तम्ह सहनिर्देशक रवि महर्जनं ब्वति कयाच्वंगु दु ।

नेपालभाषा एकेडेमीया सदस्य सचिव  नेवाः न्ह्यलुवाः मल्ल के सुन्दरं जानकारी बियादीकथं थुगुसी थ्व छधा प्याखं ब्वज्याजक मजुसे कासाय् हे कथं जुइमाःगु खःसां कोरोना संक्रमणया ग्याचिकु व लकडाउनया कारणं याना थथे लिकुने मालाच्वंगु खनेदुसाः नेपालभाषा एकेडेमीया ग्वसालय् जुइत्यंगु थ्व छधा प्याखं ब्वज्या तालाकेत एकेडेमीया प्राज्ञ दुजः बीरप्रसाद भन्सारीया कजिसुइ छगु पुचः निस्वना तःगु दु ।

ब्वज्या  पुचःया दुजः विजयरत्न असंबरें जानकारी बियादीकथं आः ईलय् खनेदया च्वंगु विषम परिस्थितिइ छधा प्याखं ब्वज्यायात गुलि तःजिक्क यायेमाःगु खः उलि तःजिक यायेमखंसा थौंया प्रविधीया लिधंसा कया थ्व ब्वज्या नेपाः च्यानल डिस होमपाखें टेलिभिजन लाइभ प्रसारण जुइगु जुउगु दु । असार १६ खुन्हु जुइत्यंगु थ्व ब्वज्या बागमति प्रदेश या कला,संस्कृति व साहित्य बिकास आर्थिक ग्वाहालिइ जुइत्यंगु खःसा ब्वज्या कीपुया राराहिल स्कुलया नाटक घरपाखें लाइभ क्यनिगु ग्वसाः दु ।

छधा प्याखं ब्वज्याय् न्ह्यब्वइगु प्याखनय् रामकृष्ण खडगीया निर्देशनय् लोककवि राजभाई जकःमि च्वयादीगु “कीर्तिलक्ष्मी” आशिष्मा नकःमिं एतिहासिक पात्र कीर्तिलक्ष्मी जुया म्हितेत्यंगु दुसा थुके रामकृष्ण खड्गी, कृष्णभक्त महर्जन व उजय शाहीया भुमिका दइ ।  

नांजाम्ह संकिपाकःमि सुरेन्द्र तुलाधरया च्वसा व निर्देशन दुगु “डा कान्छाभाइ” प्याखनय् रन्जना सितिखु, रामराजा भाम, रोहन प्रजापति, अन्नपूर्ण दर्शनधारि अले नांजा:म्ह साहित्यकार शशीकला मानन्धरं च्वयादीगु अले नांजाम्ह संकिपाकःमि आर्यम नकःमिया निर्देशनय् “चन्द्रहार” प्याखनय् नगिना जोशी, सुरज व्यन्जनकार, रुपेन्द्र श्रेष्ठ, रोजिना सुवाल, अन्नपुर्नेश्वरी श्रेष्ठ, सरस्वति मानन्धर दुथ्याना च्वंगु दुसा थ्व ब्वज्याय् राजेश शाक्यया निर्देशनय् रङ्गकर्मि रामकृष्ण धिनां नं च्वयादीगु “थ्वपु कर्म, सन्चारकःमि व रङ्गकर्मि कृष्ण प्रजापतिया च्वसा व निर्देशनय् “बुँख्याःचा”य् कृष्ण प्रजापति, गीता प्रजापति, जुनु प्रजापति, सकुन्तला महर्जन, सिताराम माकः, नांजा:म्ह कलाकःमि राजु स्यःस्यःया च्वसा व निर्देशनय् “तरकारी बन्जा” प्याखनय् भिमसेन रिसाल व सुरेश स्थापित अले साहित्यकार व सन्चारकःमि मीना बज्राचार्यया च्वसा व वरिष्ठ रङ्गकर्मि व संकिपाकःमि पवन जोशीया निर्देशनय् “लिथु” प्याखनय् शोभा महर्जन,अन्नु महर्जन, यासिना महर्जन व च्वमि राजेन्द्रकुमार पुताया च्वसाय् रवि महर्जनया निर्देशनय् “थौकन्हे” नांयागु छपु छधा प्याखं दुथ्यानाच्वंगु दुसा उके प्याखंम्वः कथं कृष्ण महर्जन, विनिता खड्गी, सुधा महर्जन, रोशन शाक्य व रजिन महर्जनं ब्वति कयाच्वंगु दु ।

Categorized in कला