2565 buddha Jayanti ADV

छत्रपाति अस्पतालयात सिद्धार्थ बनस्थली स्कूलया पुलांपिं विद्यार्थीपाखें ग्वाहालि

नेवा: अनलाइन न्युज – ललेन्द्र शाक्य | २०७८ जेठ २७, बिहिबार १०:२६:१३

येँया चक्रपथ लागाय् च्वंगु सिद्धार्थ बनस्थली स्कूलया पुलांपिं विद्यार्थीपिन्सं येँया क्षत्रपातिइ च्वंगु छत्रपाति निःशुल्क चिकित्सालय अस्पतालयात आर्थिक ग्वाहालि याःगु दु ।

४७ ब्याच सिद्धार्थ बनस्थली स्कूलया विद्यार्थीपिन्सं उगु क्षत्रपाति अस्पतालय् अक्सिजन प्लान्ट तयेगु नितिं छगू लख न्ययद्वः तका ग्वाहालि याःगु खः ।

म्हिगः बुधवाः अस्पताल परिसरय् हे थ्यंकाः पुलांपिं विद्यार्थीपिन्सं उगु ग्वाहालि दांया चेक अस्पतालया नायः डा. मनोजमान श्रेष्ठयात लःल्हाःगु खः ।

उगु ग्वाहालि दांया चेक लःल्हायेगु ज्याझ्वलय् सिद्धार्थ बनस्थलीया पुलांपिं विद्यार्थीपिंपाखें न्वःवासें दिपक जोशीं कोरोना कोभिड १९ महामारी नियन्त्रणया नितिं महामारीया शुरुवाती दिंनिसें हे ग्वाहालि यानाः वयाच्वनागु जानकारी बियादिल ।

पुलांपिं विद्यार्थी पुचःपाखें थीथी थासय् ग्वाहालि यानाः वयाच्वंगुलि उकिया हे निरन्तरताया झ्वलय् डा. सोना श्रेष्ठ, डा. निरज श्रेष्ठ व डा. सपना श्रेष्ठया न्ह्यलुवाय् येँया दुनेया बस्ती क्षेत्रपाति थ्यंकागु जोशीं कनादीगु खः ।

क्षत्रपाति निःशुल्क चिकित्सालय अस्पतालया नायः डा. मनोजमान श्रेष्ठं ग्वाहालिया नितिं कृतज्ञता प्वंकूसें संक्रमितपिन्त स्तरीय स्वास्थ्य सेवा बिइत अस्पताल अहोरात्र खटेजुयाच्वंगु जानकारी बियादिल ।

अस्पतालया नायः डा. श्रेष्ठं धयादी, ‘अत्याधुनिक प्रविधि लिसेंया आइसीयु, पोर्टबेल एक्स–रे मेशीनलिसें ल्वगिपिन्त स्यल्लाःगु व स्तरीय सेवा बिइत माःगु अत्याधुनिक मेशीन व प्रविधि थन अस्पतालय् जडान यानागु दु, आः अक्सिजनया समस्या मजुइमा धकाः अक्सिजन प्लान्ट तयेत्यनागु दु ।’

ल्वगिपिन्त वासः यायेगु निसें नसाज्वलं, वासः निःशुल्क उपलब्ध याकाः वयाच्वनागु जानकारी नं अस्पतालया नायः डा. मनोजमान श्रेष्ठं बियादीगु खः ।

Categorized in राष्ट्रिय