zero media family planning adv

छगू हे छेँजःया स्वम्ह सिनाच्वंगु अवस्थाय् गोरखाया बारपाकय्

नेवा: अनलाइन न्युज – ललेन्द्र शाक्य | २०७७ फाल्गुण १०, सोमबार १२:०१:२०

गोरखाया बारपाक सुलिकोट गाउँपालिका १ बारपाकय् छगू हे छेँजःया स्वम्ह सिनाच्वंगु अवस्थाय् लुयावःगु दु ।

८४ दँया टिलबहादुर गुरुंग, वया २२ दँया भौ आइतकुमारी गुरुंग व १३ दँया छय् उषा गुरुंग सोमवाः सुथय् छेँय् हे सिनाच्वंगु अवस्थाय् लुयावःगु प्रहरीं जानकारी ब्यूगु दु ।

एसपी सुरेन्द्र बहादुर गुरुंगं धाःगु दु, सुथय् ताउतक नं छेँया खापा मचाःगु व मनूतय्गु चहःपहः नं मखनेधुंकाः गामय् च्वंपिन्सं लुखा चायेकाः स्वःबलय् स्वम्हं सिनाच्वंगु अवस्थाय् खंगु खः । जिमित खबर वयेधुंकाः बारपाकया पुचः घटनास्थल थ्यंकूगु खः ।

सिनाच्वंपिनिगु म्हुतुं ब्वाया (फिज) वयाच्वंगुलिं विषालु च्याउ नयाः ज्यान वंगु जुइफूगु अनुमान याःगु एसपी गुरुंगं धाःगु दु ।

एसपी गुरुंगं धाःगु दु, जौबारीपाखें थप प्रहरी पुचः घटनास्थलपाखें वंगु दु, पोष्टमार्टम लिपा सीगुया हुनिं सीदइ ।

Categorized in दुर्घटना-अपराध