coved ad

च्वापुवाया हुनिं मनाङ व म्याग्दीइ निम्ह बेपत्ता

नेवा: अनलाइन न्युज – ललेन्द्र शाक्य | २०७८ पौष १६, शुक्रबार १०:५१:५८

मंगलवाः सनिलनिसें वःगु च्वापुवाया हुनिं मनाङ व म्याग्दीइ छम्ह छम्ह मनू बेपत्ता जूगु दु ।

जिल्ला प्रशासन ज्याकुथि मनाङया प्रमुख रविन्द्रप्रसाद आचार्यया कथं आपालं च्वापुवा वयाः बेपत्ता जूपिं मनाङया नासों गाउँपालिकाया ५२ दँया आच्छ्यु गुरुङ खः ।

बुधवाः सनिलय् वहे वडाया तप्की लेकय् भेडीगोठ सारेयाःगु इलय् च्वापुया चलः कुतुंवःगु खः । सिडिओ आचार्यं धाःगु दु, ‘बेपत्ता जूम्ह मनूया मालेगु ज्या जुयाच्वंगु दु । आःतक छुं जानकारी वःगु मदुनि ।’

अथेहे, म्याग्दीइ बिहिवाः च्वापुवा वयाः धवलागिरी गाउँपालिका १ गुर्जाया छम्ह मनू बेपत्ता जूगु दु । जिल्ला प्रशासन ज्याकुथि म्याग्दी सहायक प्रमुख जिल्ला अधिकारी धिरेन्द्रराज पन्तया कथं बेपत्ता जूम्ह ५० दँया रामबहादुर छन्त्याल खः ।

छन्त्याल नं भेडीगोठय् वंगु इलय् च्वापुया चलः कुतुंवयाः बेपत्ता जूगु खः । सहायक सिडिओ पन्तं धाःगु दु, ‘छन्त्याललिसें मेपिं स्वम्ह नं बेपत्ता जूगु खः । तर, इपिं सम्पर्कय् वयेधुंकूगु दु । बेपत्ता जूम्ह छन्त्यालया मालेगु ज्या जुयाच्वंगु दु ।’

Categorized in स्थानिय-समाज