dudha jayanti 2568

चोबहाः सुक्खा बन्दरगाह निजी क्षेत्रयात संचालन याकेबिइत सम्झौता

नेवा: अनलाइन न्युज – ललेन्द्र शाक्य | २०८० मङ्सिर १८, सोमबार १६:१३:३७

येँया चोबहालय् च्वंगु सुक्खा बन्दरगाह संचालनया जिम्मेवारी निजी क्षेत्रयात ब्यूगु दु ।

सोमवाः समिति व ट्रान्स नेपाल टीआरएस लोजिपार्क प्रा.लि.दथुइ बन्दरगाह संचालन सम्झौताय् ल्हाःचिं जूगु खः ।

न्यादँया नितिं २ करोड ८८ लख रकम न्यूनतम सट्टापट्टा बहाल व नियम कथं महसुल बाँडफाँट यायेगु कथं सम्झौताय् ल्हाःचिं जूगु खः ।

समितिं वंगु साउन ९ गते टेण्डर आह्वान याःगुलि ट्रान्स नेपाल व न्यू नेपाल ढुवानी सेवा कम्पनीं ब्यूगु आवेदनय् समितिं प्राविधिक मूल्यांकनपाखें ट्रान्स नेपालयात बन्दरगाह संचालन अनुमति ब्यूगु खः ।

करार सम्झौता समितिया निर्देशक युवक डंगोल व संचालक कम्पनीया पाखें प्रबन्ध निर्देशक मुकेशकुमार राठीं ल्हाःचिं तःगु खः ।

समितिया कार्यकारी निर्देशक आशिष गजुरेलया कथं संस्थां न्यूनतम शुल्क कयाः स्तरीय सेवा बियाः वार्षिक १ अर्ब ३० करोडसिबें अप्वः आम्दानी यानाच्वंगु खः ।

निजी क्षेत्रया व्यवस्थापनपाखें अझ नं बांलाक्क बन्दरगाह संचालन जुइगु वया विश्वास दु ।

ज्याझ्वलय् न्वःवासें ट्रान्स नेपाल टीआरएस लोजिपार्क प्रा.लि.या प्रबन्ध निर्देशक राठीं बन्दरगाह संचालनय् छुं चुनौतीत दुसां नं उकियात ध्यानय् तयाः गृहकार्य न्ह्याकेधुनागु धाःगु दु । थःपिन्सं बिइगु सेवा स्तरीय यायेगु कुतः जुइगु नं राठीया धापू दु ।

Categorized in लजगाः