nepal investment baink

चैत्र २२ गते खोनाया देवगणपिं येँया थःने क्वःनेय् बिज्याइगु

नेवा: अनलाइन न्युज – ललेन्द्र शाक्य | ने.सं. ११४४ चिल्लागा नवमि (२०८० चैत्र २१ गते) बुधवाः

ज्यापु महागुथि येँ महानगर समितिं नीस्वंगु सिकाली अजिमा जात्रा व्यवस्थापन व समन्वय समितिं मंगलवाः पत्रकार सम्मेलन यासें जात्राया नितिं येँय् तःजिक तयारी क्वचाःगु जानकारी ब्यूगु दु । येँ महानगरपालिका १२ वडाया वडाध्यक्ष बालकृष्ण महर्जन, वडा सदस्यपिं, ज्यापु महागुथि येँ महानगर समितिया पदाधिकारी, दुजःपिनिगु नं उपस्थिती जुगु पत्रकार सम्मेलनय् ज्यापु महागुथि येँ महानगर समितिया नायः पंचनारायण महर्जनं उगु जानकारी बियादीगु खः ।

पत्रकार सम्मेलनय् पितब्यूगु प्रेस विज्ञप्तिइ थुगु दँय् झिंनिदँया जात्रा जूगुलिं खोनाया सिकाली प्याखंया देवगण लिसें सांस्कृतिक पुचः चैत्र २२ गते बिहिवाः येँय् बिज्याइगु व उगु जात्रा तःजिक क्वचायेकेगु नितिं सकलसिगु पाखें ग्वाहालि यायेत इनाप याःगु दु ।

अथेहे, विज्ञप्तिइ ज्यापु महागुथि येँ महानगर समितिया संयोजनय् येँ दुने देवगणपिं बिज्याइगु रुटय् लाःगु थीथी परम्परागत त्वाःया प्रतिनिधि, स्थानीय क्लब, संस्था व संस्थागत प्रतिनिधित्व व सक्रिय व्यक्तिपिन्त दुथ्याकाः समन्वय समिति नीस्वनागु जानकारी नं बियातःगु दु ।

विज्ञप्तिइ चैत्र २२ गते सिकाली देवगण येँय् बिज्यानाः हनुमानध्वाखाय् सिकाली प्याखं न्ह्यब्वइगु, अथेहे हनुमानध्वाखाया नासः चुक तलेजु द्यःया न्ह्यःने त्रिशूली चुकः व कालभैरव ल्यूनेया दबुली सिकाली प्याखं ल्हुइकीगु खँ न्ह्यथनातःगु दु ।

उगु विज्ञप्तिइ चैत्र २२ गते न्हिनय् सिकाली देवगणपिं बिज्याइगु लँपुया रुट नं न्ह्यथंगु दुसा विज्ञप्तिइ न्ह्यथनातःकथं येँया पचली, मचली, पुखुसि, चल्खु, स्वतामुगः गल्ली, मुसुंबहाः, सिकाली, कुमाःननी, वन्दे, ह्युमत, तुकंबहाः, न्हूघः, कोहिति, भिन्द्यः त्वाः, इलाछेँ, मरुसतः, प्याफः, कम्पुकोत, हनुमानध्वाखा जुयाः नासः चुकतक दु ।

Categorized in नेवाः