zero media family planning adv

चैत्र २० किपुली सहीद दिवस, शनिवाः सांस्कृतिक श्रद्धाञ्जली सभा

नेवा: अनलाइन न्युज – ललेन्द्र शाक्य | २०७७ चैत्र १९, बिहिबार १६:३१:४५

दँय् दसं चैत्र २० गते किपुली सहीद दिवस न्यायेकाः वयाच्वंगु दु । २०४६ सालया जनआन्दोलनय् सहादत जूपिं किपूया प्यम्ह सहीदपिं राजेन्द्र महर्जन, राजमान माली, हिराकाजी महर्जन व लनबहादुर महर्जनपिनिगु लुमन्तिइ सहीद दिवस व्यवस्थापन समारोह समिति हे नीस्वनाः दँय् दसं सहीद दिवस न्यायेकाः वयाच्वंगु खः ।

किपूया ३ वडा खासिबजाः प्रहरी चौकी न्ह्यःने किपूया प्यम्ह सहीदपिनिगु झ्वाता (सालिक) पलिस्था यानातःगु दु । चैत्र २० गतेया दिं उगु हे सहीदपिनिगु झ्वाताय् स्वां देछानाः थीथी स्कूल, कलेज, खलः पुचः, संघसंस्था लिसेलिसें सकल त्वाःया स्थानीय बासिन्दा व बाजागाजा न्ह्यब्वयाः सहीदपिनिगु लुमन्तिइ सांस्कृतिक जुलस यानाः किपू नगर चाःहिलेगु यानाः वयाच्वंगु दु ।

थ्वहे ल्याखं चैत्र २० गते कन्हय् शुक्रवाः उकथं हे किपुली तःजिक सहीद दिवस ज्याझ्वःया ग्वसाः ग्वयातःगु दु ।

थ्वहे झ्वलय् दँय् दसं इन्द्रेणी सांस्कृतिक समाज (इसास) किपूया ग्वसालय् सहीद दिवसया हे लुमन्तिइ दँय् दसं सहीद दिवसया कन्हय् कुन्हु चैत्र २१ गते सांस्कृतिक श्रद्धाञ्जली सभा ज्याझ्वः न्ह्याकाः वयाच्वंगु दु ।

थुगुसी नं न्हापाया दँय् थें इसास किपूया ग्वसालय् चैत्र २१ गते शनिवाः किपूया ९ वडा न्हूबजाःया पांगा वनेगु दुपातय् च्वंगु कृष्ण क्याटरिंगया हलय् न्हिनसिया १ः३० ता इलय् सांस्कृतिक श्रद्धाञ्जली सभा २०७७ ज्याझ्वःया ग्वसाः ग्वयातःगु दु ।

२०४६ सालया जनआन्दोलनय् सहादत जुयादीपिं सहीदपिं राजेन्द्र, राजमान, हिराकाजी, लनबहादुर नापं थीथी जनआन्दोलनय् ज्ञातअज्ञात सहीद जुयादीपिं व बेपत्ता नागरिकपिनिगु लुमन्तिइ जुइगु सांस्कृतिक श्रद्धाञ्जली ज्याझ्वस सकलसित ब्वनाच्वना धकाः सांस्कृतिक श्रद्धाञ्जली सभाया ग्वसाः खलः इन्द्रेणी सांस्कृतिक समाज (इसास) किपूपाखें सकलसित ज्याझ्वलय् सहभागिताया नितिं इनाप याःगु दु ।

Categorized in राष्ट्रिय