prabhu baink new

चैत्र ११ धुंकाः न्हापांगुखुसि चाल आन्तरिक उडान, २५ प्रतिशत उडानयात अनुमति

नेवा: अनलाइन न्युज – ललेन्द्र शाक्य | २०७७ आश्विन ५, सोमबार १०:४६:४६

नेपाल एयरलाइन्सया जहाज ७ महिना लिपाया न्हापांगु आन्तरिक उडान जुइत ताःलात

कोरोना भाइरसया संक्रमण नियन्त्रणया नितिं धासें सरकारं लकडाउन जारी यायेधुंकाः थ्यंमथ्यं ट महिना बन्द जूगु आन्तरिक हवाई सेवा थौं सोमवाःनिसें सुरु जूगु दु ।

थौं सोमवाः सुथय् ७ ता इलय् येँपाखें भोजपुरया नितिं ब्वःगु नेपाल एयरलाइन्सया जहाज ७ महिना लिपाया न्हापांगु आन्तरिक उडान जुइत ताःलाःगु दु ।

सरकारं आन्तरिक व्यवसायिक उडानयात अनुमति बिइधुंकाः थौं सोमवाःनिसें आन्तरिक हवाई सेवा सुरु जूगु खः ।

वइगु ९ न्हुतक साविकया तुलनाय् २५ प्रतिशत हवाई उडान जुइ । सामाजिक दूरी कायम यानाः पूर्ण स्वास्थ्य सतर्कता छ्यलाः हवाई यात्रा जूगु जूगु विमानस्थल ज्याकुथिं जानकारी ब्यूगु दु । १ अक्टोबर लिपा धाःसा उडान तालिका मागया आधारय् थपघट जुइ ।

न्हापांगु चरण न्हिथं ४३ गः उडानयात अनुमति ब्यूगु नेपाल नागरिक उड्डयन प्राधिकरणं जानकारी ब्युगु दु । थौं सोमवाःनिसें सुरुइ बुद्ध एयरं १६, यतिं १०, श्रीं ६ व सिम्रिक व सौर्यं छगः छगः उडानया अनुमति काःगु खः ।

Categorized in बजाः