prabhu baink new

चुनाव बूपिं बामदेव व नारायणकाजीपिन्त बम्पर उपहार : निम्हं उपप्रधानमन्त्री जुइगु

नेवा: अनलाइन न्युज – ललेन्द्र शाक्य | २०७७ भाद्र १३, शनिबार ०९:२१:४४

नेपाल कम्युनिष्ट पार्टीया विवादं निम्ह नेतापिनिगु भाग्य बल्लाःगु दु । प्रतिनिधिसभाया चुनाव बूपिं बामदेव गौतम व नारायणकाजी श्रेष्ठपिनिगु भाग्योदय जुया इपिं निम्हेस्यां उपप्रधानमन्त्री पदया बम्पर उपहार कायेत्यंगु दु ।

प्रधानमन्त्री केपी शर्मा ओलीं मन्त्रिमण्डल पुनर्गठन यायेगु तयारी यानाच्वंगु इलय् बामदेवयात राष्ट्रियसभाय् मनोनित दुजः दयेकाः उपप्रधानमन्त्रीलिसें महत्वं जाःगु मन्त्रालय बिइगु प्रस्ताव यायेधुंकूगु दु । गौतमयात थः धुंकाः वरियताय् न्हापांगु थासय् तयाः ओलीं सरकारय् यंकेत्यंगु खः । बामदेवं गृह या अर्थमध्ये छगू मन्त्रालय कायेखनीगु जूगु दु ।

नेकपाया मेम्ह नायः पुष्पकमल दाहाल प्रचण्डया कोटापाखें नारायणकाजी श्रेष्ठया नां प्रस्ताव जूगु दु । नारायणकाजी नं गोरखापाखें चुनाव बूम्ह खः । लिपा राष्ट्रियसभाया चुनाव ल्वानाः त्याकूगु खः । नारायणकाजीं नं महत्वं जाःगु मन्त्रालय कायेखनीगु जूगु दु । नारायणकाजीयात वरियताय् प्रधानमन्त्री लिपाया थासय् बिइमाःगु विषय नं ब्वलंगु दु ।

छुं अप्रत्याशित घटना विकास मजूसा बामदेव व नारायणकाजीं वइगु वाः दुने हे मन्त्रीया सपथ काइ । इमिसं १८ भाद्रय् च्वनीगु नेकपा सचिवालय बैठक न्ह्यः या लिपा मन्त्रीया सपथ काइ धैगु जक फरक विषय खः ।

Categorized in राजनीति