ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

चीन : मचातय्त स्कूल छ्वयेत अभिभावकं कोरोना खोप कायेमाःगु

नेवा: अनलाइन न्युज – ललेन्द्र शाक्य | २०७८ श्रावण १, शुक्रबार १५:११:३९

चीनया छुं छुं स्थानीय सरकारं अभिभावकपिन्सं कोरोना खोप मकाःसा विद्यार्थीपिन्त स्कूल दुमकायेगु योजना हःगु दु । 

वइगु सेप्टेम्बरय् छेँजःया फुक्क दुजःपिन्सं कोरोना खोप मकाःसा उगु छेँजःया विद्यार्थीपिन्त स्कूलय् दुकायेगु अनुमति मबिइगु योजना न्ह्यःने हःगु दु ।

अथेहे, छुं छुं सहरय् अस्पताल व सुपरमार्केटय् दुहाँ वनेगु नितिं नं कोरोना खोप अनिवार्य यायेगु तयारी याःगु दु ।

अन्तर्राष्ट्रिय संचारमाध्यमया कथं चीनं थुगु दँया लिपांगु इतकया दुने थःगु देशया ६४ प्रतिशत नागरिकपिन्त कोरोना खोप बिइगु योजना कथं थुज्वःगु पलाः छ्यूगु खः । थ्वसिबें न्ह्यः फ्रान्स व ग्रीसं नं जोखिम जूगु थासय् वनेगु नितिं कोरोना खोप अनिवार्य यायेगु धाःगु खः ।

चीनया गुआन्सी प्रान्तया बेइलिउ सहरं सार्वजनिक याःगु छगू सुचनाय् न्ह्यथनातःगु दु, ‘खोप मकाःपिं मनूतसें थः मचातय्त हाकनं स्कूल छ्वयेगु नितिं छुं पंगः मजुइमा धैगु तातुनाः याकनं हे कोरोना खोप कायेमा ।’

थ्व नियम फुक्क उमेर समूहया विद्यार्थीपिन्त लागू जुइगु धाःगु दु । अथेहे जियाङ्सी व हेनान प्रान्तया स्थानीय सरकारं नं खोप मकाःपिं अभिभावकया मचातय्त स्कूलय् दुमकायेगु धाःगु दु ।

मेगु चिनियाँ प्रान्त हेबेइस धाःसा १२ निसें १७ दँ उमेर समूहया विद्यार्थीपिन्त पूरा डोज खोप मकाःसे स्कूलय् मवयेत सुचं सार्वजनिक याःगु दु । साङसी प्रान्तया हाङचेङय् खोप मकाःपिं मनूतय्त होटल, रेष्टुरेन्ट व मनोरञ्जन थासय् अनुमति मबिइगु नियम हःगु दु ।

चीनया थीथी सहरय् खोप मकाःपिन्त खोप कायेगु नितिं ब्यूगु डेडलाइन ब्यागलं ब्यागलं दु, तर अधिकांश मनूतसें धाःसा जुलाईया लिपांगु ईयात डेडलाइट ब्यूगु दु ।

चीनं आःतक १ अर्ब ४० करोड डोज कोरोना खोप मनूतय्त बिइधुंकूगु दु । अय्सां चीनं गुलि प्रतिशत मनूतसें न्हापांगु व गुलिसिनं निक्वःगु डोज नं काल धैगु खुलस्त याःगु मदुनि ।

Categorized in अन्तर्राष्ट्रिय