1142 nhoo dan adv

चीनय् मंकाः ब्वायफ्रेण्ड !

२०७२ भाद्र २०, आइतबार १३:०३:२९

छम्ह मिसाया यक्व मिजंपासा दयेकल धाःसा उम्ह मिसायात स्वइगु दृष्टिकोण बांमलाःथें छम्ह हे मिजनं यक्व मिसापासा दयेकाः जुल धाःसां नं झीगु समाजय् स्वइगु दृष्टिकोण बांलाः मजू । खतुं मिजंतय्त छुं भचा प्राथमिकता बियातःगु दु नेपालय् । अथे नं नेपालय् चलन चल्ती दुगु खय् भाय्या छुनाखँ “दुई जोइको पोइ, कुना बसी रोइ’ पाखें मिजंतय्सं यक्व मिसा तल कि गुज्वःगु लिच्वः वइ धइगु खँ क्यनाच्वंगु दु । 

तर चीनया डोंगगुवान सहरय् धाःसा थौं कन्हय् छगू थुज्वःगु संस्कार ब्वलंगु दु ,गन छम्ह मिजंया यक्व मिसापासा (गर्लफ्रेण्ड) दइ । मिजंतय्सं यक्व मिसापासालिसे मस्ती याइगु विषययात कयाः आः उगु सहर चर्चाय् दु । चिनिया मिडियातसें छुं दिं न्ह्यः जक थुज्वःगु यक्व किपात पितब्यूगु दु गुकी छम्ह मिजंयात थीथी मिसात लिसे चुम्बन यानाच्वंगु व नापं द्यनाच्वंगु अवस्थाय् खंकेफइ । अझ रोचक खँ ला छु धाःसा थनया मिस्त मिजंपासा (ब्वायफ्रेण्ड)यात ध्यबा पुलाः जूसां डेटिङय् वनेगु याइ । 

डोंगगुआन चीनया दक्षिणी प्रान्त गुआंगडोंगया अति महत्वपूर्ण औद्योगिक सहर खः । थुकियात विश्वया हे कारखानाया नामं नं म्हस्यू । तर लिपांगु इलय् धाःसा थ्व चीनया सेक्स राजधानीकथं कुख्यात जुयावनाच्वंगु दु । थुकिया मूहुनिं अन मिसा व मिजंतय् ल्याःया अनुपात तसकं असन्तुलित जुयावनाच्वंगु दु । उगु सहरय्  हरेक सच्छि मिस्तय्त केवल ८९ म्ह जक मिजं दु । 

मिस्तय् लागि मिजं हे मगाइगु जुसेंलि मिस्त मिजंपासा शेयर यायेत बाध्य जूगु दु । सहरया  अधिकांस ल्यासेत कारखानाय् म्हो हे जक ज्याला दुसां नं ज्या याइ । सुं मिजंलिसे इहिपा जुइमा धइगु निंतिं उमिसं यक्व कुतः याइ । इहिपा मजूतले ध्यबा पुलाः जूसां मिजंतलिसे रोमान्स यायेमाःगु बाध्यता दु उमिगु ।

मिस्तय्सं थम्हं डेटिंग यानाच्वनाम्ह मिजंया मेपिं यक्व गर्लफ्रेण्डत दु धइगु सी, अथे नं उमिसं वहे ब्वायफ्रेण्डलिसे च्वनी । बहु सम्बन्ध निभाः थें छर्लंग जूगुलिं जुइ मिसामिजंत थःपिनि यक्वलिसेया सम्बनधया बारे कनेत हिच्किचय् जुइमखु ।