nepal life 2076 3 18

चीनयात ख्याच्वः बिइत अमेरिका, बेलायत व अष्ट्रेलियादथुइ सुरक्षा सम्झौता

नेवा: अनलाइन न्युज – ललेन्द्र शाक्य | २०७८ भाद्र ३१, बिहिबार १०:३१:५१

अष्ट्रेलियां न्हापांगुखुसि परमाणु ऊर्जापाखें चलेजुइगु पनडुब्बी निर्माण याइगु

चीनया अत्याधुनिक रक्षा प्रवधियात ख्याच्वः बिइगु आज्जुं अमेरिका, बेलायत व अष्ट्रेलियां रक्षा प्रणालीया विकासया नितिं विशेष सुरक्षा सम्बन्धी सम्झौता याःगु दु ।

चीनया अप्वःगु सैन्य क्षमता व इन्डोप्यासेफिक क्षेत्रय् चीनया प्रभाव खनाः सशंकित जूगु थुगु स्वंगु राष्ट्रदथुइ जूगु थ्व सम्झौतायात ‘ओकस’ नां ब्यूगु दु ।

उगु सम्झौता कथं अष्ट्रेलियां न्हापांगुखुसि परमाणु ऊर्जापाखें चलेजुइगु पनडुब्बी निर्माण याइगु जूगु दु । लिपांगु सम्झौतालिसें अष्ट्रेलियां फ्रान्सेली पनडुब्बी खरिद यायेगु सन् २०१६ या सम्झौता रद्द याःगु दु ।

ओकस सम्झौतां आर्टिफिसियल इन्टेलिजेन्स, क्वान्टम प्रवित्रि व साइबरया पक्षयात कःघाइगु बीबीसीं जानकारी ब्यूगु दु । थ्व सम्झौतालिपा स्वंगुलिं मुलुकया साइबर क्षमता, आर्टिफिसियल इन्टेलिजेन्स व समुद्र क्वय् च्वंगु सैन्य क्षमता स्वंगू गुणां अप्वःगु बीबीसीं जानकारी ब्यूगु दु ।

अमेरिका, बेलायत व अष्ट्रेलियादथुइ जूगु ओकस सम्झौतायात चीनं विरोध प्वंकूगु दु । अमेरिकाया वासिङ्टनय् च्वंगु चिनियाँ राजदूतावासं अमेरिका, बेलायत व अष्ट्रेलिया शीतयुद्धया मानसिकताय् दूगु द्वपं ब्यूगु दु ।

Categorized in अन्तर्राष्ट्रिय