नेवा: अनलाइन न्युज | २०८० भाद्र १२, मंगलबार १४:०३:११

चीनं सोमवाः थःगु देसया न्हूगु नक्सा सार्वजनिक याःगु दु । चीनं उगु नक्सायात ‘स्टान्डर्ड म्याप’ धाःगु दु ।

न्हूगु नक्साय् भारतया अरुणाचल प्रदेश, अक्साई चीनयात थःगु हिस्सा जूगु क्यंगु दु । नक्साय् साउथ चाइना सी व ताइवानयात नं चीनया हिस्सा धाःगु दु ।

अंग्रेजी न्हिपौ ग्लोबल टाइम्सं सामाजिक संजाल एक्सय् थ्व नक्सा सार्वजनिक यासें धाःगु दु, ‘चीनया सन् २०२३ या स्टान्डर्ड म्याप सोमवाः सार्वजनिक जूगु दु । थ्व नक्सा प्राकृतिक संसाधन मन्त्रालयया वेबसाइटय् लञ्च याःगु खः । थ्व नक्सा चीन  विश्वया मेमेगु देसया ‘ड्रइङ मेथड’या आधारय्दयेकूगु दु ।

ब्रिक्स सम्मेलनय् भारतीय प्रधानमन्त्री नरेन्द्र मोदी व चिनियाँ राष्ट्रपति सी जिनपिङया छुं दिं न्ह्यः जक नापलायेज्या जूगु खः । उगु नापलाये ज्याय् निगू देसया सीमा विवादया विषयस सहलह जूगु धाःगु इलय् थ्व नक्सा सार्वजनिक जूगु खः ।

थ्वसिबें न्ह्यः सन् २०२३ या अप्रिलय् चीनया नागरिक मामिला मन्त्रालयं अरुणाचल प्रदेशया झिंछगू थाय्या नां हिलेगु अनुमति ब्यूगु खः । चीनं अरुणाचल प्रदेशया ९० हजार वर्गकिलोमिटर जमिनय् थःपिनिगु दाबी यासें वयाच्वंगु दु ।

उखे भारतं पश्चिम अक्साई चीनया ३८ हजार वर्गकिलोमिटर क्षेत्रय् चीनं अवैध रुपं कब्जा याःगु द्वपं बिसें वयाच्वंगु दु ।

Categorized in अन्तर्राष्ट्रिय