1142 nhoo dan adv

चिर स्वायेगुया अर्थ छु खः?

डा. चुन्दा बज्राचार्य
बसन्तपुर लँया दथुइ हनुमान ध्वाखाया न्ह्यःने व यलया कृष्ण देगलय् न्ह्यःने आदि थाय् थासय् चिर स्वायेगु धकाः ताःहाकःगु पँथय् स्वतँया चाकलाःगु छत्रय् थीथी रंग बिरंगया कापः कुचा कुचा चिनाः यःसिं थनेथें थनातइगु खः ।
स्वये बलय् स्वतँ दुगु छत्रथें च्वं । यलय् कृष्ण देगःया न्ह्यःने चिर स्वाइगु धयागु सिमाय् रंगी बिरंगीया कापः खानाः स्वाइगु खः ।


चिरया अर्थ खः वसः । विशेष यानाः अझ मिसापिन्सं पुनीगु वसः खः । बास्तबय् रंगीचंगी कापः कुचा कुचा चिनाः छत्र थनेगु स्वयां रंगी बिरंगीया कापः सिमाय् खानाः ब्वइगु चिरनाप सतीगु स्वापू खः ।
थथे चिर स्वायेगु धकाः कृष्णया पालय् अर्थात् दैवीककालय् गोकुलय् कृष्णं थीथी लीला क्यंगु मध्यय् छगू रास लीला खँनाप स्वापू दूगु खः ।
गोकुलया गोपिनीत छन्हु यमुना खुसिइ म्वःल्हुइत थःपिनि वसः दक्वं खुसि सिथय् तयाः थःपिं खुसिइ दुनाच्वंगु जुयाच्वन ।

उगु इलय् कृष्ण नं गोपिनीत म्वः ल्हुयाः च्वंगु यमुना खुसिइ थ्यंकः वल । गोपिनीतय्सं वसः त्वःताः म्वः ल्हुयाच्वंगु कृष्णं खनाः दक्व वसः कयाः सिमाय् खानाः म्वः ल्हुया च्वंपिं गोपिनीतय्त हायेका च्वंगु जुयाच्वन । लिपा गोपिनीतय्सं कृष्णयात चित्त बुझय् यानाः थःथःगु वसः कयाः पुनेखंगु खः ।


कृष्णं गोपिनीपिनिगु वसः सिमाय् खाःगु हे चिर स्वानाः सिमाय् कापः खायेगु खः धकाः धाइपिं दु । श्रीकृष्णं गोपिनीत नापं रसरंग याःगु जुगुलिं होलिबलय् विशेष यानाःमिजंपिन्सं मिसापिन्त, मिसापिन्सं मिजंपिन्त अबिर, रंगं क्ययेकाः, ईकाः, पाकाः, तयेकाः, लोला, बेलुनय् रंग जायेकाः कयेकाः म्हितेगु चलन जूगु खः धाइपिं दु । मिसा मिजंया दथुइ जक मखु मिसा मिसा, मिजं मिजंपिं दथुइ नं अबीर तयेकाः, रंग छ्वाकाः, पचुकां रंग छ्वाकाः, लोलाय् रंग भरे यानाः बेलुनं क्ययेकाः होेलि म्हितेगु चलन दु ।

( थौं चिल्लाथ्व अष्टमी चिर स्वाइगु दिंया विशेष च्वसू किपाः बिनोद तुलाधर
 )