Header Nepal rastra bank Adv

चिनियाँ जेट विमान ताइवानया सर्गतय् दुहाँ वन

नेवा: अनलाइन न्युज – ललेन्द्र शाक्य | २०७९ श्रावण २०, शुक्रबार १६:२७:१६

चीनं ताइवान लिक्क निन्हुया दिंया सैन्य अभ्यास न्ह्याकूगु दु । थ्वहे झ्वलय् चिनियाँ जेट विमान हाकनं ताइवानया सर्गतय् दुहाँ वंगु दु ।

ताइवानया रक्षा मन्त्रालयया कथं शुक्रवाः सुथय् आपालं चिनियाँ लडाकु विमान व जहाजं ताइवान स्ट्रेटया मध्य रेखा पार याःगु खः । इमिसं सिइकसिइकं हे ताइवान स्ट्रेट पार यायेत्यनाच्वंगु दु । मिसाइल प्रणाली तैनाथ यानाः चीनया गतिविधियात निरन्तर निगरानी यानाच्वनागु ताइवानया रक्षा मन्त्रालयं जानकारी ब्यूगु दु । छुं छुं विमान व जहाजयात अनुगमनया नितिं छ्वयागु तकं धाःगु दु ।

भारतीय समाचार एजेन्सी दैनिक भाष्करया कथं चिनियाँ सेनां ताइवान जःखःया खुगू क्षेत्रय् उकथं सैन्य अभ्यासत यानाच्वंगु दु । सैन्य अभ्यासया न्हापांगु दिं सच्छिसिबें अप्वः चिनियाँ लडाकु विमानं ताइवानया उत्तरी, दक्षिण–पश्चिम व दक्षिण–पूर्वी हवाई क्षेत्रय् उडान याःगु दु ।

वास्तवय् अमेरिकी संसदया सभामुख न्यान्सी पेलोसीया ताइवान भ्रमणयात कयाः चीन व ताइवानदथुइ विवाद अप्वःगु खः । पेलोसी अगष्ट २ स ताइवान थ्यंकूगु खः । पेलोसी लिहाँ वनेखतं हे चीनं अगष्ट ४ स ताइवान लिक्क सैन्य अभ्यास न्ह्याकूगु खः ।

Categorized in अन्तर्राष्ट्रिय