1142 nhoo dan adv

चिनाखँ : जि क्वःमदःनि, म्वानाच्वना तिनि

–ललेन्द्र शाक्य, किपू


जि, जि जुयाः म्वायेमफुत
अय्सां म्वानाः च्वना बाम्ह सी, बाम्ह म्वाः जुयाः
ग्व, जिके ला न ल्हाः दु, न तुति
न दनेफु, न सनेफु, देगः दुनेया ल्वहँया मूर्ति जि ला ।।

दुनुगःया सुभाय् व सुवाः दु छिमित, मेगु मदु छुं, ग्व छु बिइ ?
जितः ल्हाः छुकेत स्वल, तुति स्वायेत स्वल
थ्वहे छिमिगु महानता व जिप्रतिया मतिना थुइका
धात्थें आः जिं थःगु ल्हाः च्वलेफइला ? थःगु तुतिं चुइफइला ?
लिसः मामां जि, गन तं गन तं, जितः झुमिं यंकाच्वन
आः भलःसा व आशा छिमिगु हे, लिसः पियाच्वना ।।

खय्तला, जिगु म्हसीका, जिगु पूर्खा गोत्र ‘नामो निशान’ हे तनेधुंकूगु खः
छिमिगु चिल्लाय् दंगु सलं जि न्ह्यलं चाल, गुनुन्हुं छिमिगु सः थ्वल
छिमिगु ममतां जाःगु सः दुने जिं खना,
अय् ! जि ला थ्व थाय्या छगू कुंचाय् दनी खनी
जि, जि जुयाः म्वायेगु तिनातःगु लुखा चाली तिनी
जि नं ला सकसिगु नुगलय् च्वंम्ह नुगःद्यः खनी
जिगु नं जि जुया छिइगु तंगु लँपु लुइतिनी  ।।

धात्थें थ्व म्हगस खः कि यथार्थ ? न्ह्यलसय् खः कि ज्वलय् ?
चायेक चायेकं हे जि मिं पूम्ह खिचाथें झसंग वन
हाकनं नुगः खुलुलुं मिन, तरवारं म्हगलय् कीबलय् हिबाः हाःथें मिखां ख्वबि हाल
जंगलय् धुँ शेरया दथुइ लाः फःफः मदयेधुंकूम्ह अर्ना जि
धुँ शेर बिसिकेत तुपः ल्वाभः ज्वना वइपिं छिपिं हे कि ? ।।

सास दत्तले आश याये जिं, छिमिगु भलसाय् म्वानाच्वने जि
छिमिगु ह्यूपाः व त्याग तपस्याया निभाः जलय् लुमुक्क च्वनाच्वने जि
छन्हु ला छन्हु भराय् धिकःम्ह तिमिला जुयाः सर्गतय् ब्वब्वं त्वयेमानी
छिमिगु कुतलं जि छम्ह अस्तित्वधारी जः जुयाः खयेमानी
जि, जि जुया म्वायेगु आज्जु अझं ल्यं दनि  ।।    

–ने.सं. ११४१ कौलागा द्वादसी मंगलवाः ( २०७८ कार्तिक १६ गते)