kmc bidya

चिकंया मू हाकनं क्वाहाँ वल एसियाली बजारय्

नेवा: अनलाइन न्युज – ललेन्द्र शाक्य | २०७६ चैत्र १९, बुधबार १४:०७:०६

साउदी अरेबियां चिकं उत्पादन अप्वयेकेधुंकाः एसियाली बजारय् बुधवाः चिकंया मू क्वाहाँ वःगु दु । कोरोना भाइरसया महामारीया हुनिं हलिंन्यंकं आः चिकंया मागय् कमी वःगु दु ।

वंगु सोमवाः नं चिकंया मूल्यस १८ दँया हे न्यून विन्दुइ क्वाहाँ वःगु खः तर भाइरसपाखें ब्वलंगु आर्थिक क्षतियात न्यूनीकरण यायेत हलिंया नीति निर्मातापिन्सं न्ह्यःने हःगु न्हूगु नीतिया हुनिं बजराय् छुं सुधा जूगु दु ।

बुधवाः न्हिनय् एसियाली बजारय् अमेरिकी बेन्चपार्क वेस्त टेक्सास इन्टरमिडिइट (डब्लूटिआईं)स १.६६ प्रतिशतंं कमी वयाः कच्चा चिकं प्रतिब्यारेल २०.१४ अमेरिकी डलरय् न्याये मिइगु ज्या जूगु दु । बजार चाःबलय् धाःसा डब्लूटिआईया मूल्यस छुं बृद्धि जूगु खः ।

अन्तर्राष्ट्रिय बेन्चमार्क ब्रेन्ट कच्चा चिकंया मूल्यस नं ३.४२ प्रतिशतं कमी जुयाः प्रतिब्यारेल २५.४५ अमेरिकी डलरय् न्याये मिइगु जूगु दु ।

हलिंया बजारय् चिकंया माग म्हो जूसां नं साउदी अरेबिया व रसिया दथुइ चिकं उत्पादनय् कटौती मयायेगु घोषणां बजारय् चिकंया मूल्यस आपालं गिरावट वःगु खः ।

एएनजेड बैंकया छम्ह विश्लेषकं पानीजहाजया ट्राकिङपाखें साउदी अरेबियां वंगु वाः कच्चा चिकंया मिइगु मू अप्वयेकूगु खनेदूगु धाःगु दु । साउदी अरेबियां प्रतिदिन ७० लख ब्यारेलपाखें थ्यंमथ्यं ९० लख ब्यारेल चिकं उत्पादन याःगु अनुमान याःगु दु ।

अमेरिकी राष्ट्रपति डोनाल्ड ट्रम्पं चिकं उत्पादनयात म्हो यायेत याःगु इनापयात बेवास्ता यासें साउदी अरेबियां हलिंया चिकं आपूर्ति अप्वयेकाः प्रभाव कायम याये चाहेजूगु एक्सीकर्प ग्लोबल मार्केटया रणनीतिकार स्टिफेन इन्सं धाःगु दु ।

थुगु दँया सुरुनिसें मार्च महिनाया अन्त्यतक अर्थात् स्वलाया ई दुने चिकंया मूल्यस थ्यंमथ्यं ६० प्रतिशतसिबें अप्वलं कमी वःगु दु ।

Categorized in बजाः