1142 nhoo dan adv

चिकंया थकाःगु मू लितकायेत प्रधानमन्त्रीयात ज्ञापन पौ

नेवा: अनलाइन न्युज – ललेन्द्र शाक्य | २०७८ मङ्सिर ८, बुधबार १५:५७:०५

पेट्रोलियम पदार्थय् थकाःगु मूल्य बृद्धि लितकायेत माग यासें खुगू विद्यार्थी संगठनं प्रधानमन्त्री शेरबहादुर देउवायात ज्ञापन पौ लःल्हाःगु दु ।

बुधवाः बालुवाटार थ्यंकाः अखिल क्रान्तिकारीया नायः पञ्चासिंह, अनेरास्ववियुया नायः सुदेश पराजुली, समाजवादी विद्यार्थी युनियन नायः रुपनारायण श्रेष्ठ, विप्लव लिक्कलाःगु अखिल क्रान्तिकारीया नायः प्रकाश शाही व मोहन वैद्य लिक्कलाःगु अखिल क्रान्तिकारी नायः हरिकृष्ण गजुरेलं मूल्य वृद्धि लितकायेत माग यासें प्रधानमन्त्री देउवायात ज्ञापन पौ लःल्हाःगु खः ।

ज्ञापन पौ लःल्हायेगु झ्वलय् प्रधानमन्त्री देउवां मूल्य वृद्धिया विषयस सम्बन्धित निकायस परामर्श यानाः सकारात्मक निर्णय कायेगु लिसः ब्यूगु अखिल क्रान्तिकारीया नायः पञ्चासिंहं धाःगु दु ।

सिंहं धाःगु दु, ‘सम्बन्धित निकायलिसे परामर्श यानाः मूल्य सम्भव जुइफक्क समायोजन यायेगु कुतः जुइगु आश्वासन प्रधानमन्त्रीं ब्यूगु दु ।’

पेट्रोलियम पदार्थ चिकंया मूल्य बृद्धिया हुनिं आधारभूत जनताया न्हिथंया पलाखय् तप्यंक लिच्वः लाःगु धासें उद्योग मन्त्रालय तकं कःघानाच्वंम्ह प्रधानमन्त्रीयात खुगू विद्यार्थी संगठनया नेतापिन्सं नापलानाः ज्ञापन पौ लःल्हाःगु अखिल क्रान्तिकारी नायः पञ्चासिंहया धापू दु ।

लिपांगुखुसि इन्धनया मूल्य बृद्धिलिपा विद्यार्थी संगठनत आन्दोलनय् क्वाहाँ वयाच्वंगु दु ।

Categorized in राजनीति