nepal life 2076 3 18

चाःबहिया श्री चन्द्रविनायक (ल्होंसा गणेद्यः) श्री भैरवनाथया जात्रा थौंनिसें

सचिन शाक्य

येँया प्यम्ह विनायक (सूर्यविनायक, चन्द्रविनायक, अशोकविनायक व जलविनायक) मध्ये चाःबहिया श्री चन्द्रविनायक (ल्होंसा गणेद्यः) छम्ह प्रमुखम्ह खः । दँय्दसं सकिमिला पुन्ही (कार्तिक पून्ही) निसें कार्तिक कृष्णपक्षया तृतियातक प्यन्हुयंकं जात्रा जुइगु खः । थ्व जात्रा नेपाल संवत ८००  व ८०४ निसें जुजु भुपालेन्द्र मल्लं राज्य याःगु इलंनिसें न्ह्याःगु इतिहासविद् व संस्कृतविद्पिनिगु धापू दु ।

जात्राया न्हापांगु दिं कार्तिक पुन्हीकुन्हु बन्थी गणेद्यःया परिसरय् तःजिकः धुनि च्याकी । थुकिया क्वाःजलं म्हयात तःसकं भिं जुइ व पुण्य लाभ जुइ धैगु जनविश्वास दुगुलिं भक्तजनपिनिगु हुलमुल हे जुइ ।

वहे दिंकुन्हु कुटुवहाःया शाक्यपिनि देगुद्यःया नं पुजा याना नापंच्वंगु जम्बक राजा (ध्वं द्यः) या प्रस्तर मूर्तियात जां भुना पुजा याइ । हलिमलिया (मनातःगु हिचाकु, सकि व सियातःगु कःनि, मुस्या, छुस्या, बरां, कय्गु, चना, इत्यादी) कलात्मक आकृति नं दयेकेगु याइ ।
गणेद्यःया प्रांगणय् कुमार कुमारीयात मलःजा नकेगु नं याइ । 

गणेद्यः व भैरद्यःयात विशेष पुजा याना द्यःया प्रतिमा स्थापना याइ । कन्हय्कुन्हु बन्थी श्री पशुपतिनाथ अमालकोट कचहरीं अनया पारम्परिक व साँस्कृतिक प्रमुख द्वारें पुजा हया बहनीसिया ८ व ९ ता इलये श्री चन्द्रविनायक व श्री भैरवनाथया रथयात समाः यानाः चाःबहीया गुथ्याःपिं नं थःगु पाः अनुसार गजू, गणेद्यः व भैरद्यःया  प्रतिमा हया रथय् आरोहण याकी ।

द्वारें हःगु सिन्दुर छ्याकालि स्थानिय परम्परागत बाजागाजा नापं गणेद्यः व भैरद्यःया रथ ल्ह्वनी । गणेद्यःया त्वःफ्यूगु तिसाः क्याथें च्वंकः थःगु देगलय् वनेत स्वइ अलय् भैरवं लँ पनेथें याना छुं ई निगू रथया दथुइ प्रतिस्पर्धात्मक परिक्रमा जुइ । परिक्रमा लिपा निगुलिं रथ देगःया उतरय् च्वंगु प्रचीन गंगाहिटीइ यंकाः म्वःल्हुकेगु याइ । वहे चान्हय् गणेद्यःया परिसरय् च्वंगु छेँ व डबली तःया पुजा यानालिं रथयात चाःबही विहारया न्ह्यःने तइ ।

जात्राया स्वन्हुया दिं चाःबहीया थीथी थासय् रथयात नगर परिक्रमा याकी । श्री चन्द्रविनायकया रथयात श्री पशुपतिनाथया परिक्रमा नं याकी । रथयात नगर परिक्रमा न्हिच्छि धैथें बिका बन्थी चाःबहीया परिसरय् पुजाआजा क्वचायेकाः रथयात घौछिति प्याखँ ल्हुइका भैरवया रथं गणेद्यः रथयात स्वकः परिक्रमा याना भैरद्यःया रथ न्हापालाकः चाःबहीया डवलीइ दिकी अले गणेद्यःया रथ दिकालि द्वारें हाकनं सिन्दुर छानाः मूजात्राया समापन याइ ।

जात्राया लिपांगु दिं यानि कार्तिक तृतियाकुन्हु भैरद्यः व गणेद्यःयात तःधंगु रथं चीधंगु रथय् तया, झःझः धायेकः समाः याना चाःबहीया परिक्रमा याना सिन्दुर जात्रा याइ । परिक्रमा क्वचायेकालिं पाःलाःपिनिगु छेँ द्यः दुकायेधुंकाः श्री चन्द्रविनायक व श्री भैरवनाथया जात्रा क्वचाइ ।

थथे थुगु जात्रायात प्राचीन इलंनिसें आःतक्व तःजिक हनाः वयाच्वंगु दुसा श्री चन्द्रविनायक व श्री भैरवनाथया पुण्य लाभया जनविश्वसया हुनिं भक्तजन व संस्कृतिप्रेमीपिनिगु ल्याखय् अप्वयाः वयाच्वंगु दु । वि.सं. २०६६ निसें थौंतक थ्व जात्रायात व्यवस्थित व अझ झः झः धायेक हनेत नगरया सरोकारवालापिं छथाय् च्वनाः “श्री चन्द्रविनायक तथा श्री भैरवनाथ जात्रा समन्वय समिति” नीस्वनाः थुगु हे समितिं जात्रा न्ह्याकाः वयाच्वंगु दु ।