kmc bidya

चलचित्र विकास बोर्डय् नायः पदय् सु वइगु जुइ ?

नेवा: अनलाइन न्युज – विजयरत्न | २०७७ जेठ ६, मंगलबार २२:०९:१६

नेपाल सरकार सूचना तथा सञ्चार प्रविधि मन्त्रालय अन्तर्गतया चलचित्र सम्बन्धी सकतां ज्या याइगु राज्यया प्रशासनिक संयन्त्रया रुपय् २१ दँ न्ह्यः पलिस्था जूगु चलचित्र विकास बोर्डया नायः कलाकार केशव भट्टराई वंगु २०७६ साल मंसीर २९ गते आकाझाकां मत्यवं मदुसांनिसें प्वनाच्वंगु नायः पदय् नियुक्तिया नितिं सूचना तथा सञ्चार प्रविधि मन्त्रालयपाखें प्रक्रिया न्ह्याकुगु दु ।

प्रक्रिया कथं खालि जूगु नायः पदया नितिं सरोकारवाला संकिपामि पाखें आवेदन बिइत सुचं पिकाःगु खःसा आवेदन बिउपिं मध्ये योग्य व्यक्ति ल्ययेत जेठ ६ गतेनिसें मन्त्रालयया सिंहदरबारय् च्वंगु ज्याकुथिइ अन्तर्वाता काःगु दु ।

म्हतिं नं प्रविणता प्रमाणपत्र तह पास यानातःम्ह जूसा संकिपा क्षेत्रय् २० दँसिबे अप्वःया अनुभव मुनातःम्ह वा स्नातक तह पास यानातःम्ह जूसा १० दँ संकिपा क्षेत्रया अनुभव दुम्ह अनुभवी संकिपामिपाखें आवेदन तयेत इनाप याःगुलिइ १० म्हेसिन आवेदन बिउगु खः ।

थथे दुहाँ वःगु आवेदनया लिधंसाय् जेठ ६ गतेनिसें अन्तर्वार्ता कायेगु क्वछिनातःगु खःसा थौं संगीतकार व संकिपा निर्माता अर्जुनकुमार डंगोल, संकिपा निर्देशक दीपक श्रेष्ठ व संकिपा निर्देशक व चलचित्र विकास बोर्डका वर्तमान सदस्य दयाराम दाहालया अन्तर्वार्ता जूगु खःसा कन्हय् जेठ ७ गते थारु भाषाया संकिपा निर्माता व निर्देशक एवं हलधनी परशुराम चौधरी, कलाकार भीमा मैनाली धकाः नांजाम्ह भगवति कुमारी मैनाली व संकिपामि ध्यानबहादुर सुब्बाया अन्तर्वाता जुइगु क्वछिनातःगु दु ।

न्हियान्हिथं सनिलया ५ ता इलय् जुइगु अन्तर्वार्ताया झ्वलय् ८ गते नांजाःम्ह अभिनेता भुवन के सी, साँस्कृतिक संस्थानया भूतपुर्व महाप्रबन्धक राजेश थापा, संकिपा निर्देशक राजेन्द्र कुमार उप्रेती व अभिनेता एवं अष्टनारायण हलया धनी त्रिरत्न मानन्धरया काय् भाजु  सोहित मानन्धरया अन्तर्वार्ता जुइगु क्वछिनातःगु दु ।

चलचित्र विकास बोर्डया नायः पदया उम्मेदवार भाजु मानन्धर माननीय शहरी विकास राज्यमन्त्री रामबीर मानन्धरया काय्चा नं खः ।

Categorized in कला