coved ad

चन्द्रागिरीं ४ लख ४३ हजार नगदलिसें १६ म्ह जुवाडे ज्वन

नेवा: अनलाइन न्युज – ललेन्द्र शाक्य | २०७८ कार्तिक २१, आइतबार १२:२९:३७

प्रहरीं ४ लख ४३ हजार ५०३ तका दांलिसें १६ म्ह जुवाडे ज्वंगु दु ।

महानगरीय प्रहरी वृत्त थक्वाः व प्रभाग बलबुँपाखें मंकाः रुपं खटेजूगु टोलीं चन्द्रागिरी नगरपालिका वडा ल्याः १४ पुलांगु नैकाय् च्वंगु शंकर थापाया छेँय् जू (जुवा) म्हिताच्वंगु अवस्थाय् शनिवाः बहनी ९ ता इलय् १६ म्हेसित ज्वंगु खः ।

महानगरीय प्रहरी परिसर येँया प्रवक्ता, प्रहरी उपरीक्षक रमेशकुमार बस्नेतं दांया तःधंगु त्याःबू जुइगु कथं जू म्हिताच्वंपिं १६ म्हेसित न्हयपं तासलिसें नियन्त्रणय् काःगु जानकारी ब्यूगु दु ।

प्रहरीं ज्वंपिं चन्द्रागिरी नगरपालिका १३ पुलांगु नैकाप छेँ दुम्ह ५२ दँया पुष्कर थापा, वहे नगरपालिका च्वनीम्ह ४६ दँया पूर्णबहादुर बस्नेत, ४१ दँया सुदर्शन बिडारी, ४६ दँया लव कार्की, ४४ दँया सुदामा केसी, ३१ दँया विजय बुढाथोकी, ५० दँया रविन्द्र थापा, ४३ दँया राजन खत्री खः ।

अथेहे, चन्द्रागिरी नगरपालिका १३ या ३६ दँया विश्वासजंग कार्की, ४० दँया सन्जु थापा, ३८ दँया निरञ्जन शाह ठकुरी व ४४ दँया अष्टमान महर्जनपिन्त नं प्रहरीं ज्वंगु दुसा चन्द्रागिरी नगरपालिका १४ या ४१ दँया शंकर थापा, चन्द्रागिरी नगरपालिका १२ वडाया निरञ्जन केसी, दैलेख दुन्नु नगरपालिका ११ या चन्द्रागिरी नगरपालिका १३ वडाय् च्वनाः वयाच्वंम्ह ४७ दँया गणेश रसाइली व काभ्रे पाँचखाल नगरपालिका ११ छेँ दुम्ह आः दक्षिणकाली नगरपालिका १ च्वनाः वयाच्वंम्ह ३६ दँया कृष्णबहादुर मगरपिन्त नं ज्वनागु प्रहरीं जानकारी ब्यूगु दु ।

प्रहरीं ज्वंपिं मनूतय्के नगद, नीपं तास व थीथी कलरया क्वाइन बरामद याःगु दु । ज्वंपिन्त थप अनुसन्धान जुयाच्वंगु प्रहरीं जानकारी ब्यूगु दु ।

Categorized in दुर्घटना-अपराध