dudha jayanti 2568

चक्रमान डंगोल (२०१६–७२)या बहःचा हाकःगु जीवनी

– रत्नकाजी मन

भाजु आशा डंगोल व मय्जु दशमाया डंगोलया माइलाम्ह काय्कथं भाजु चक्रमान डंगोलया जन्म वि.सं. २०१६ साल जेठय् येँया ह्यूमत त्वालय् जूगु खः । वय्कःया तिरिमय्जु लक्ष्मी महर्जन खःसा छम्ह काय् चमितमान डंगोल व छम्ह म्ह्याय् चाहना डंगोल दु । वय्कःया अबुजु थ्व संसारय् मदये धुंकलसा मां धाःसा दी । वय्कलं एसएलसीतकया औपचारिक शिक्षा कयादीगु दु । 

मचांनिसें हे गणेशमानसिंहया नेतृत्वय् जुइगु थीथी राजनीतिक गतिविधिइ सक्रिय जुयादीम्ह वय्कः २०३६ सालनिसें सक्रियरुपं नेपाली कांग्रेसय् न्ह्यज्यानादीगु खःसा २०४२ सालय् आउटबूथ क्याप्चर, सत्याग्रह व २०४६ सालया जनआन्दोलनय् सक्रिय जुयाः ब्वति कयादिल । २०४९ सालया स्थानीय निकायया चुनावय् येँया १२ वडाय् उम्मेदवारी बियादीम्ह वय्कः निर्वाचित जुयादिल । १२ वडाया वडाध्यक्ष जुयादीगु इलय् हे वय्कलं येँया फोहरमैला व्यवस्थापन, चुंगीकर व्यवस्थापनय् तदारुकता क्यनादिल । थुकथं हे रत्नपार्क व सुन्धारा लागाय् अस्तव्यस्तकथं तयातःगु फूटपाथ पसःयात चीकेत नं वय्कलं विशेष भूमिका म्हितादिल । लिसें ह्यूमतय् ह्यूमत बजाः चायेकाः अनया इञ्चार्ज नं जुयादिल । 

येँ महानगरपालिकाय् १२ वडाया प्रतिनिधि कथं वय्कलं फोहरमैला व्यवस्थापनया संयोजकया भाला नं क्वबियादीगु खः । येँया फोहर व्यवस्थित यायेत ओखरपौवा डम्पिङ साइट मालेज्या यानादीगु खःसा विष्णुमति लिंकरोड निर्माणया ज्या नं वय्कलं हे न्ह्याकादीगु खः । 

नेपाल किसान संघया पूर्व अध्यक्षतकं जुयादीम्ह भाजु डंगोल पञ्चायतकालीन किसान संघय् जिल्ला उपाध्यक्षतक जुयादीगु खः । 

नेपाःमिपिन्त स्वदेशय् हे रोजगार  बीमाः धइगु भावना तयादीम्ह भाजु डंगोलया उपाध्यक्षताय् नेपाल मिटर ट्याक्सी व्यवसायी संघ तकं गठन जूगु खः । थुगु संघपाखें नाइट ट्याक्सी सर्भिस नं वय्कःया नेतृत्वय् न्ह्याकूगु खः । 

२०६२–६३ सालया जनआन्दोलनय् नं सक्रियरुपं ब्वति कयादीम्ह डंगोल अप्वः धयाथें स्थानीय रुपय् हे सक्रिय जुयादीसा नेपाली कांग्रेसया काठमाडौं जिल्ला सदस्यलिसें वीपी कोइराला स्मृति प्रतिष्ठानया येँ जिल्लाया अध्यक्ष जुयाः ज्या यानाच्वनादीम्ह खः । 

सामाजिक ख्यलय् नं उतिकं हे सक्रिय जुयादीम्ह चक्रमान डंगोल आवद्ध थीथी संस्था व पद थुकथं दु ः

१) नारायण परिवार क्लव – अध्यक्ष

२) ज्यापु संस्कृति विकास कोष – अध्यक्ष

३) जयकिसान हित बहुमुखी सहकारी संस्था लि. – संस्थापक अध्यक्ष÷सल्लाहकार

४) श्रीज्यापु महागुथि नेपाः – सल्लाहकार

५) महिला बौद्ध समूह बुद्धवारी – सल्लाहकार

५) झी ज्यापु मिसा पुचः – सल्लाहकार

६) नेवाः मिडिया क्लव – संरक्षक

७) लिधंसा मिसा पुचः – सल्लाहकार

८) ह्यूमत मिसा पुचः – सल्लाहकार

९) किलाघः सांस्कृतिक पुचः – सल्लाहकार

१०) यूथ भोलेन्टियर्स – सल्लाहकार

११) काठमाडौं विकास समूह – सदस्य

थुकिया लिसें मेमेगु थीथी संघसंस्थाय् नं वय्कः थीथीकथं संलग्न जुयाच्वनादीम्ह खः । 

शिक्षा ख्यःया विकासया यायेमाः धइगु मनंतुनादीम्ह डंगोल ह्यूमतय् च्वंगु राष्ट्रिय निम्न माध्यमिक विद्यालय व सरस्वती निकेटन माध्यमिक विद्यालयया सल्लाहकार नं जुयादी । 

सञ्चारया ख्यलय् न्ह्यमज्यायेकं सामाजिक विकास जुइमखु धइगु धारणा तयादीम्ह वय्कःया परिकल्पनाकथं हे थौं झीगु न्ह्यःने काठमाडौं महानगरपालिकापाखें न्ह्याकावयाच्वंगु मेट्रो एफएम धस्वानाच्वंगु दुसा रेडियो उपत्यका नं वय्कःया हे कुतलं स्थापना जूगु एफएम खः । वय्कः रेडियो उपत्यकाया प्रमुख जुयाः क्रियाशील जुयाच्वनादीगु खः । 

धार्मिक कर्मय् नं उतिकं हे आस्था व विश्वास तयादीम्ह वय्कः स्वयम्भु संरक्षण तथा व्यवस्थापन महासमितिया एक्सन ग्रूपया संयोजक जुयाः नं ज्या यानादिल । वय्कलं थुगु पदभारकथं स्वयम्भुइ त्वाथः दयेकेगु, अनया सुचुकुचु यायेगुनिसें कयाः अनया भौतिक संरचना विकास यायेगु ज्याय् ज्वःमदुगु योगदान बियादीगु दु । 

स्वयम्भुइ थें हे पचली द्यःयाथाय् नं वय्कःया उलि हे सक्रिय व्यक्तित्व खः । पचली भैरव क्षेत्र विकास समितिया उपाध्यक्ष जुयाच्वनादीम्ह वय्कःया हे सक्रियताय् पचली भैरवया त्यप हिलेगु ज्या जूगु दुसा पचली लागाय् नं सुचुकुचु व अनया रंगरोगन व विकासनिर्माणय् सक्रिय जुयाच्वनादीम्ह व्यक्तित्व खः । 

थुकथं सामाजिक, धार्मिक व राजनीतिक ख्यलय् थ्यंमथ्यं प्यंगू दशकतक अथकरुपं न्ह्यचिलादीम्ह चक्रमान डंगोल ने.सं. ११३५ दिल्लाथ्व पारु (२०७२ श्रावण १ गते) शुक्रवाः वासः याकुयाकुं हे मन्त । छुं दिं न्ह्यःजक जँलासेँया समस्या जुयाः अस्पताल भर्ना जुयादीम्ह वय्कः डायलसिस यायेगु क्वचायेकाः वसः फिनाच्वंगु इलय् आकाझाकां हर्ट एट्याक्ट जुयाः मदुगु खः ।