zero media family planning adv

चःमति ज्याथः क्यब म्येचाः पितब्वज्याय् मेयर शाक्यं सम्पदा संरक्षणया दाबी

नेवा: अनलाइन न्युज – ललेन्द्र शाक्य | २०७७ फाल्गुण २, आइतबार १२:५८:१५

चःमति नेवाः खलः, चःमति मिसा खलः व चःमति बहुउद्देशीय सहकारी लिमिटेडया ग्वसालय् सनिवाः छगू लसता तुच्चा ज्याझ्वः व चःमति ज्याथः क्यब नांया म्येचाःया उलेज्या जूगु दु ।

चःमति नेवाः खलःया नायः व लोकंह्वा:म्ह कलाकार पूर्णकाजी ज्यापुया च्वसां पिज्वःगु चःमति ज्याथः क्यब नांया म्येचाः उलेज्याया मूपाहाँ कथं झायादीम्ह येँ महानगरपालिकाया मेयर विद्यासुन्दर शाक्यं व विशेष पाहाँ शहरी विकास राज्यमन्त्री रामबीर मानन्धर लगायतं पितब्वज्या यानादीगु खः ।

उगु ज्याझ्वलय् मूपाहाँ मेयर शाक्यं येँ महानगरपालिकाया विकास थःपिं मेयर जुइधुंकाः छसीकथं जुयाच्वंगु दु धकाः धयादिसें लानिपुखू, पलेस्वाँ कमल पुखू लगायतया महानगरपालिकां संरक्षण व जिर्णोद्धार यायेत स्वःबले छथ्वः मनूतसें विरोधया सः थ्वयेकुगुयात कुंखिना दिल ।

पाहाँ संकिपा पत्रकार विजयरत्न असंबरें संगीतकःमि कलाकार पूर्णकाजी ज्यापुया कारणं चःमति त्वाःया नां सगीत व संकिपा ख्यलय् नं थ्वया वःगु खँ उल्लेख यानादिलसा विशेष पाहाँ मन्त्री मानन्धरं थःम्हेसिनं संगीतख्यःया नांया विश्व रेकर्ड दयेके खँगुलिं लसता प्वंकादिल ।

ज्याझ्वलय् वहालवाला मन्त्रीपाखें म्येहाला विश्व रेकर्ड तयेत तालानादीम्ह शहरी विकास राज्यमन्त्री रामबीर मानन्धरयात ग्वसाः खलःपाखें मूपाहाँ मेयर शाक्यं हनापौ लःल्हानादीगु खः । ग्वसाः खलःया कजि पूर्णकाजी ज्यापुया सभानायसुइ उगु ज्याझ्वलय् ग्वसाः खलःया छ्यान्जे राजेन्द्र महर्जनं लसकुस न्वचू तयादीगु खःसा नांजाःम्ह म्येहालामि जुजुकाजी रन्जितं पितब्वज्या जूगु म्येचाःया समीक्षा यानादिल ।

थीथी साँगितिक व साँस्कृतिक न्ह्यब्वया नं न्ह्यब्वःगु उगु ज्याझ्वलय् म्येहालामिपिं सतिश महर्जन, कल्पना श्रेष्ठ व पूर्णकाजी ज्यापु लगायतं म्येहाला न्यंकादीगु खःसा  नेपाः डान्स एकेडेमीपाखें थीथी हुलाप्याखँ नं न्ह्यब्वःगु खः ।

Categorized in कला