घ्यःचाकु संल्हुनिसें स्वकुमिपिनिगु न्ह्यःने ‘कर्म’ वइगु
नेवा: अनलाइन न्युज – Bijay Ratna | २०७८ पौष २६, सोमबार १२:२८:५८
नेवाः संकिपाः ख्यलय् ताःई न्ह्यःनिसें चर्चाय् वयाच्वंगु नेपालभाषाया संकिपा ‘कर्म’ पिदनीगु जूगु दु ।
आः वइगु नखः घ्यःचाकु संल्हुनिसें यलया ग्वार्कोय् च्वंगु गुण सिनेमा हलय् उगु नेवाः संकिपा ‘कर्म’ क्यनीगु जुउगु दु ।
गुण सिनेमा हलया दिजेन्द्र शाक्यं निर्माण यानादीगु संकिपा ‘कर्म’ बुद्धकालीन बाखनय् आधारित संकिपा खः ।
थ्व संकिपाया निर्देशन रामकृष्ण खड्गीं यानादीगु खः । निर्देशक खड्गीं थ्वसिबें न्हापा पटाचारा व कृषा गौतमी नं निर्देशन यानादीगु खः ।
‘कर्म’ संकिपाय् नेपाःया लोकंह्वाःम्ह हिरो कर्मा शाक्य व लोकंह्वाःम्ह हिरोइन आशिष्मा नकःमिया नापनापं ख्यालिजुजु मदनकृष्ण श्रेष्ठ, नारायणदेवी प्रधान, अन्नपुर्णेश्वरी श्रेष्ठ, कृष्णभक्त महर्जन, लुनिभाः तुलाधर, रुमन जोशी, संघरत्न शाक्य, वत्स शाक्यया नापनापं यमन श्रेष्ठ व रजनी खड्गीपिनिगु मू भूमिका दु ।
थ्व ‘कर्म’ संकिपाया संगीत राजु तुलाधर, रामकृष्ण खडगी व बालकृष्ण बंशी खः । अथेहे, सह–निर्देशक राजन शाही, म्येच्वमि रामकृष्ण खड्गी व राजु तुलाधर, हुलाप्याखं स्यनामि राजन शाही, पार्श्वसंगीत व सम्पादन बालकृष्ण बंशी, किपालुमि लुजः सिंह व सह–निर्माता दिपर्श शाक्य खः ।
Categorized in कला