zero media family planning adv

घ्यःचाकु सँल्हुनिसें तिंख्यः चःकनी, माघ १ गतेनिसे पार्किङ्ग निषेध

नेवा: अनलाइन न्युज | २०७६ पौष २८, सोमबार १५:०७:४३

येँ महानगरपालिकां वइगु बुधवाः माघ १ गते घ्यःचाकु सँल्हुया दिंनिसें येँया तिंख्यः (खुल्लामञ्च)य् सवारी साधन पार्किङ्ग निषेध याइगु जूगु दु ।

तिंख्यःयात न्हापाथें हे चकंख्यः यानातयेगु योजना कथं महानगरं माघ १ गतेनिसें लागू जुइगु कथं सवारी साधन पार्किङ्ग निषेध यायेत्यंगु खः ।

तिंख्यःयात अतिक्रमणपाखें मुक्त यायेत धासें वंगु कार्तिकनिसे) न्ह्याःगु अकुपाई तिंख्यःया अभियन्तापिन्सं तिंख्यःयात खाली याकेत तच्वकं बः बियाः वयाच्वंगु खः ।

तिंख्यः खुल्ला हे यानातयेमाःगु जूगुलिं माघ १ गतेनिसें गाडी पार्किङ्गय् रोक तयेत्यंगु महानगरया वडा १८ या वडाध्यक्ष भाइराम खड्गीं धाःगु दु । छुं ईथुखे अस्तव्यस्त जुयाच्वंगु तिंख्यलय् सवारी साधन पार्किङ्ग बन्द जुइधुंकाः सार्वजनिक ज्याझ्वःत यायेफइगु वडानायः खड्गीं धाःगु दु ।

छुं इलय् देसया चर्चित नेतातय्गु भाषण यायेगु मु दबुया रुपं दूगु तिंख्यः आः बसपाकृ, अनधिकृत पार्किङ्ग व निर्माण हलंज्वलं मुंकेगु थाय् जुयाः अस्तव्यस्त जुयाच्वंगु खः ।

पुलांगु बसपार्कय् भ्यूटावर निर्माण ज्या न्ह्याकेधुंकाm छुं ईया नितिं धासें महानगरं बसपार्कयात अस्थायी रुपं तिंख्यलय् स्थानान्तरण याःगु खः ।

तिंख्यः क्षेत्रय् भानु माध्यमिक विद्यालय (दरबार स्कूल) निर्माणया जिम्मा काःगु चिनियाँ ठेकेदार कम्पनीया निर्माण हलंज्वलंत तयातःगु दुसा थ्यंमथ्यं बच्छि भूभाग बसपार्कं नःगु दु ।

अकुपाई तिंख्यः अभियन्तापिन्सं छुं ई न्ह्यः तिंख्यलय् डोजर छ्यलाः चा वांछ्वयेगुया लिसें सुचुपिचु ज्याझ्वः तकं याःगु खः ।

Categorized in स्थानिय-समाज