नेवा: अनलाइन न्युज – ललेन्द्र शाक्य | २०७७ भाद्र १३, शनिबार १३:०४:०६

प्रहरीं ग्वंगःबुँ हत्याया अनुसन्धान क्वचायेकाः अभियुक्तविरद्ध जन्मकैदया माग दाबी यासें अनुसन्धान प्रतिवेदन सरकारी वकिल ज्याकुथिइ लःल्हाःगु दु ।

महानगरीय प्रहरी परिसर येँया कथं अनुसन्धान प्रतिवेदन बिहिवाः येँ जिल्ला सरकारी वकिलया ज्याकुथिइ पेस याःगु खः । प्रतिवेदनय् रोल्पा रुन्तीगढीया ४५ दँया कृष्णबहादुर बोहरा हत्याया मू अभियुक्त चितवन शक्तिखोरया ३७ दँया कल्पना मुडभरी पौडेलयात मानेयाःगु दु ।

कल्पनायात जन्मकैदया व सीम्ह व्यवस्थापनया ग्वाहालिमि धाःम्ह कल्पनाया १५ दँया म्ह्याय्यात धाःसा जन्मकैदया दुई तिहाइ कम सजाय माग याःगु दु ।

परिसरया प्रवक्ता एसपी सोमेन्द्र सिंह राठौरं अनुसन्धान क्वचायेकाः बिहिवाः प्रतिवेदन सरकारी वकिल ज्याकुथिइ पेस यानागु धाःगु दु । वं धाःगु दु, बोहरा हत्या अनुसन्धान क्वचाःगु दु । अध्ययन प्रतिवेदन बिहिवाः सरकारी वकिल ज्याकुथिइ लःल्हानागु दु ।

घटनाय् दुथ्याःम्ह मू अभियुक्तविरुद्ध जन्मकैदया माग दु । ग्वाहालिमिया भूमिका म्हितूम्ह मचाल्यासे विरुद्ध धाःसा जन्मकैदया दुईतिहाइ सजाय माग याःगु दु ।

प्रहरीं हत्याय् दुथ्याःम्ह कल्पनायात २७ साउनय् चितवनपाखें गिरफ्तार याःगु खः । हत्या याःगु दिंया हे सनिलय् कल्पना १५ दँया म्ह्याय् व १३ दँया काय् ज्वनाः एम्बुलेन्सपाखें चितवनया शक्तिखोरय् च्वंगु थःछेँय् थ्यंकूगु खः ।

गिरफ्तारीलिपा येँय् हःम्ह कल्पनाविरुद्ध प्रहरीं विस्तृत अनुसन्धान न्ह्याकूगु खः । बयानय् कल्पनां योजनाबद्ध ढंगं हे बोहाराया हत्या यानागु स्वीकार याःगु दु । म्ह्याय् नं सीम्ह व्यवस्थानय् ग्वाहालि याःगु कल्पनां बयान ब्यूगु दु ।

२५ साउनय् ग्वंगःबुँ गणेशस्थानपाखे छगः हाकूगु सुटकेसय् छ्यं पालातःगु सीम्ह व छ्यं छुं भच्चा तापाक्क झोलाय् लुयावःगु खः । बोहरा हत्या जूगु दिं २४ साउनया बहनी कल्पनाया हे कोथाय् च्वंवंगु खः ।

धौ नयेधुंकाः कृष्णबहादुर बेहोस जूगु व वधुंकाः मुगलं कृष्णबहादुरया संवेदनशील अंगय् प्रहार यानाः वया हत्या याःगु अनुसन्धानपाखें सीदूगु खः ।

येँ परिसर प्रमुख एसएसपी श्याम ज्ञवालीं बोहराया हत्या योजनाबद्ध ढंगं हे जूगु अभियुक्त कल्पनां स्वीकार याःगु खँया जानकारी ब्यूगु खः ।

(नयाँ पत्रिका न्हिपौपाखें)

Categorized in पत्रपत्रिका