kmc bidya

गौरीफन्टा नाकां १४०० म्ह नेपाःमि नेपाः दुहाँ वल

नेवा: अनलाइन न्युज – ललेन्द्र शाक्य | २०७७ जेठ ८, बिहिबार १९:४३:२०

स्वदेश लिहाँ वयेत कैलालीया गौरीफनटा नाकाय् १४०० म्हसिबें अप्वः नेपाःमि मुंगु दु । इपिंमध्ये कैलाली व कञ्चनपुरया नागरिकया नाकाय् हे रापिड डाइग्नोस्टिक टेष्ट (आरडिटी) विधिपाखें कोरोना परीक्षण यानाः दुकायेगु सहायक प्रमुख जिल्ला अधिकारी मोहनराज जोशीं जानकारी ब्यूगु दु ।

आरडिटी किट अभावया हुनिं मेगु जिल्लाया नागरिकपिन्त सम्बन्धित स्थानीय तह नं परीक्षण यानाः क्वारेन्टाइनय् तयेगु कथं नेपाः दुकाइगु जोशीं धाःगु दु ।

जोशीं धाःगु दु, ‘कैलाली व कञ्चनपुरया नागरिकपिनिगु थन परीक्षण जुइ । वधुंकाः किट मगात धाःसा स्थानीय तह नं हे परीक्षण याइ ।’

सीमा क्षेत्रय् स्वास्थ्यकःमिं कैलाली व कञ्चनपुरया नागरिकया आरडिटी परीक्षण याःगु दु । कैलालीइ ८०० गू जक आरडिटी किट दूगुलिं फुक्कसिगु परीक्षण यायेमफइगु जोशीं धाःगु दु ।

जोशीं धाःगु दु, ‘आः परीक्षण जूपिं नं उद्धार पियाः च्वंपिं खः । स्थानीय तह नं सवारी छ्वयाहये धुंकाः इमित गन्तव्यय् छ्वयेगु जुइ ।’

थौं बिहिवाः नं कैलालीया गौरीफन्टा नाकां ८५८ म्ह नेपाःमिं स्वदेश लिहाँ वःगु दु ।

Categorized in राष्ट्रिय