zero media family planning adv

गोल्डेन भ्वाईस अफ नेपाल प्रेमध्वज प्रधान अस्पताल भर्ना

नेवा: अनलाइन न्युज – ललेन्द्र शाक्य | २०७८ बैशाख १७, शुक्रबार १६:०९:३२

नेपाःया बरिष्ठ संगीतकःमि गोल्डेन भ्वाईस अफ नेपाल प्रेमध्वज प्रधान अस्पताल भर्ना जूगु जानकारी बरिष्ठ संगीतकःमि योगेश वैद्यं थःगु फेसबुक पेजपाखें जानकारी बियादीगु दु ।

बरिष्ठ संगीतकःमि वैद्यं धयादीगु दु, झी सर्वप्रिय बरिष्ठतम् अग्रज गायक लिसें संगीतकःमि प्रेमध्वज प्रधान जु कोभिड १९ पाखें संक्रमित जुयादीगु आशंकाय् तत्काल माःगु वासः यायेगु नितिं काठमाडौं न्यूरो व जनरल अस्पतालय् भर्ना जुयादीगु दु । वय्कःया शीघ्रातिशीघ्र स्वास्थ्य लाभया नितिं प्रार्थना यानाच्वना ।

गोल्डेन भ्वाईस अफ नेपाल प्रेमध्वज प्रधान नेपाःया संगीत ख्यलय् मदुम्ह स्वरसम्राट नारायण गोपाल गुरुवाचार्ययात म्ये हालेगुलि तिबः बियाः संगीत ख्यलय् हयादीम्ह अग्रज खः । उगु इलय् नारायण गोपाल छम्ह तबला बादक खः । 

अथेहे, नेपालभाषा संगीत ख्यलय् दकले न्हापां रक एण्ड रोल म्ये हालादीम्ह गायक नं प्रेमध्वज प्र्रधान हे खः । वय्कलं दकले न्हापांगुखुसि नेवाः रक एण्ड रोल म्ये ‘बालाबाला चिंगु मिखा...’ बोलया म्ये थःम्हं हे गितार थानाः त्रिचन्द्र कलेजया सांगितिक ज्याझ्वलय् लाईभ कन्सर्ट बियादीगु खः । गोल्डेन भ्वाईस अफ नेपाल प्रेमध्वज प्रधानं उगु इलय् ‘माइतीघर’ नांया संकिपाय् म्ये हालादीगु खःसा उगु इलय् म्ये रिकर्ड यायेत भारतया बम्बई वनेमाःगु ई खः । उगु ‘माइतीघर’ संकिपाया नकिं अर्थात् हिरोइन माला सिन्हा खः । प्रेमध्वजया संगीत प्रतिभा खनाः मोहित जुयाः माला सिन्हां उगु इलय् प्रेमध्वज प्रधानयात भारतय् हे च्वनेत इनाप याःगु खः । तर, प्रेमध्वज प्रधानं थःगु नेपाःया संगीतपाखें तापाक्क च्वनेमालीगु वाः चायेकाः माला सिन्हाया इनापयात स्वीकार मयाःसे नेपाः तुं लिहाँ झाःगु खः ।

Categorized in कला