city axpris 2

गोपीकृष्ण सिनेमा हल फागुन १ गतेनिसें बन्द जुइगु

नेवा: अनलाइन न्युज – ललेन्द्र शाक्य | ने.सं. ११४४ पोहेलागा चःह्रे

गोपीकृष्ण सिनेमा हल फागुन १ गतेनिसें बन्द जुइगु जूगु दु ।

गोपीकृष्ण मुभिज प्रा.लिं शुक्रवाः विज्ञप्ति सार्वजनिक यासें हल बन्द जुइगु जानकारी ब्यूगु खः ।

कोरोनाकालनिसें अप्वःगु घाटा व राज्यया विद्यमान कर प्रणालीया हुनि क्यंसें हल बन्द यायेगु निर्णय काःगु प्रबन्ध निर्देशक नीरक पौडेलं जानकारी ब्यूगु दु ।

२८ दँ न्ह्यः पलिस्था जूगु थुगु हल नेपाली फिल्म प्रदर्शनया इतिहास कुबियातःगु हल खः । बरिष्ठ चलचित्रकःमि उद्धव पौडेलं पलिस्था याःगु थ्व हलया मू संरचना कोरोना लकडाउनलिपा थुंगु खः । मुक्कं न्हयगू हलपाखें थुनाः निगू अडिटोरियम जक ल्यंदूगु खः । ल्यंदूगु निगू हल नं बन्द यायेगु निर्णय याःगु खः ।

सुरुइ गोपीकृष्ण हलय् १८ सयसिबें अप्वः दर्शक क्षमता दूगु खः । प्रबन्ध निर्देशक पौडेल फिल्म चलेमजूग्ु धाःगु दिनय् नं अकुपेन्सी ६० प्रतिशत जुइगु जूगु लुमंकूगु दु ।

बलिउड फिल्म ‘राजा हिन्दुस्तानी’ लच्छितक हाउसफुल चलेजूगु लुमन्ति वयाके दु । ‘बाहुबली २’ रिलिज जूबलय् न्हयगुलिं हल हाउसफुल जूगु खः ।

नेपाली फिल्म निर्माताया नितिं गोपीकृष्ण हल बांलाःगु कमाइ बिइगु स्रोत नं खः । प्रत्येक शुक्रवाः व शनिवाः गोपीकृष्णया बाल्कोनीइ थ्यंकाः कलाकारपिन्सं दर्शकपिन्त अभिवादन याइगु खः । फिल्म वृत्तय् थ्व हलया प्रभाव थुलितक दु कि छु फिल्म हिट व छु फिल्म फ्लप धैगु निर्धारण थ्व हलया कलेक्सनं याइगु खः ।

वंगु महिना येँ महानगरं कर पुलेत ताकेता याःगु खः । कर पुइकेगु धासें महानगरया अधिकृतपिं हलय् हे थ्यंकाः छवाःया दुने कर पुलेत ताकेता याःगु खः । स्थानीय कर व चलचित्र विकास बोर्डया शुल्कप्रति असन्तुष्टि प्वंकूसें चलचित्र संघया आह्वानय् वंगु सोमवाः देय् न्यंकंया हल बनद याःगु खः ।

संघया कथं न्हापा ४५० हल दूगुलि आः वयाः मुलुकय् १५० ति जक हल संचालनय् दु ।

Categorized in कला