swastha 3

गैंडाकोट दुर्घटनाय् लानाः सीपिं स्वम्हेसिगु म्हसीका जुल

नेवा: अनलाइन न्युज – ललेन्द्र शाक्य | २०७८ भाद्र २९, मंगलबार ११:४६:५४

गैंडाकोटय् मंगलवाः सुथय् बस व ट्रक ल्वानाः जूगु दुर्घटनाय् लानाः सीपिनिगु म्हसीका सीदूगु दु ।

सीपिं बर्दिया जिल्ला बाँसबारी नगरपालिका वडा ल्याः ८ या ७० दँया योगमाया सुवेदी, कञ्चनपुरया महेन्द्रनगर झलारी च्वनीम्ह ३५ दँया कृष्ण राना व कञ्चनपुरया हे ४० दँ रंगी तिवारी जूगु प्रहरीं जानकारी ब्यूगु दु ।

सीपिं योगमाया सुवेदीया भरतपुर अस्पताल व मेपिं निम्हेसिगु चितवन मेडिकल कलेजय् वासः यायेगु झ्वलय् सीगु खः ।

दुर्घटनाय् २४ म्ह घाःपाः जूगु दु । घाःपाः जूपिंमध्ये स्वम्हेसीगु अवस्था तच्वः जुयाच्वंगु दुसा ७ म्ह मध्यम व १४ म्हेसिगु अवस्था सामान्य जूगु प्रहरीं जानकारी ब्यूगु दु ।

गैंडाकोट नगरपालिका वडा ल्याः १० य् च्वंगु २३ स्मृति तां लिक्क सुदूरपश्चिम प्रदेश ०२–००१ ख ११२३ ल्याःया बस व अःखः दिशां वयाच्वंगु ना६ख ७१२६ ल्याःया ट्रक मंगलवाः सुथय् ४ ता इलय् ल्वाःगु खः ।

Categorized in दुर्घटना-अपराध