prabhu baink new

गृहमन्त्रालयया परिपत्र जिल्ला प्रशासनयात : मोहनीया इलय् शक्तिपीठ चायेके बिइमते

नेवा: अनलाइन न्युज – ललेन्द्र शाक्य | २०७७ आश्विन ३०, शुक्रबार १३:३९:३०

गृहमन्त्रालयं ७७ गू जिल्लाय् हे जिल्ला प्रशासन ज्याकुथियात परिपत्र यानाः थुगु दँया मोहनी नखःया नवरात्रय् छुं नं देगः लिसें शक्तिपीठ चायेके मबिइत निर्देशन ब्यूगु दु ।

म्हिगः बिहिवाः मन्त्रालयं फुक्क स्थानीय प्रशासनयात परिपत्र जारी यानाः मन्त्रिपरिषदं देगः चायेकेगु विषयस छुं नं निर्णय मयाःगुलिं मोहनी नखःया इलय् शक्तिपीठय् नित्यपूजाया नितिं बाहेक सर्वसाधारणपिन्त दुमकायेत निर्देशन ब्यूगु खः ।

गृहमन्त्रालयया प्रवक्ता चक्रबहादुर बुढां शक्तिपीठ खुल्ला यायेबलय् कोरोनाया प्रसार झन हे अप्वइगु बारे स्वास्थ्इ मन्त्रालयया तकं च्यूताः दूगु व मन्त्रिपरिषदं तकं धार्मिक क्षेत्र खुल्ला यायेगु निर्णय मयाःगुलिं वहे कथं परिपत्र याःगु जानकारी ब्यूगु दु ।

असोजया निगूगु वा शक्तिपीठ व देगः चायेकेत आग्रह यासें संस्कृतिक पर्यटन व नागरिक उडड्यन मन्त्रालयं सीसीएमसीइ प्रस्ताव छ्वःगु खः । मन्त्रालयया प्रवक्ता कमलप्रसाद भट्टराई नं थःपिन्सं शक्तिपीठ चायेकेगु बारे यानागु प्रस्तावय् आःतक छुं लिसः मवःगु धाःगु दु । उगु प्रस्तावय् स्वास्थ्य मन्त्रालयं जारी याःगु स्वास्थ्य मापदण्ड पालना यायेगु कथं देगःत चायेकेत आग्रह याःगु खः ।

अथेहे, असोज २१ ग्ते ओलांगचुंगोला थ्यंकूम्ह संस्कृति पर्यटन व नागरिक उड्डयनमन्त्री योगेश भट्टराई नं नं कार्तिक १ गतेनिसें शक्तिपीठ चायेकेगु तयारी जुयाच्वंगु धाःगु खः ।

तर मन्त्रालयया प्रस्तावय् सीसीएमसीं छुं निर्णय याःगु मदुनि । सीसीएमसीं निर्णय यानाः मन्त्रालयस उगु प्रस्ताव छ्वयेमाःगुलि सीसीएमसीं निर्णय हे याःगु मदुनि ।

गृहमन्त्रालयं जारी याःगु परिपत्रय् मन्त्रिपरिषदं मेगु निर्णय मयाःतले तकया नितिं धकाः फुक्क देगः व शक्तिपीठ बन्द यायेत निर्देशन ब्यूगु बुढां जानकारी ब्यूगु दु ।

Categorized in राजनीति