Newa Ekata Diwas Gosthi Adv

गुल्मीइ जीप दुर्घटना : न्याम्ह सित स्वम्ह घाःपाः

नेवा: अनलाइन न्युज – ललेन्द्र शाक्य | २०७७ मङ्सिर १२, शुक्रबार ११:०१:३२

गुल्मीइ जीप दुर्घटना जुयाः न्याम्ह मनूत सीगु दु । जीपय् च्वनावःपिं निम्ह तच्वकं घाःपाः जूगु दु ।

जिल्लाया इस्मा गाउँपालिका वडा ल्याः ४ या हुल धैगु थासय् लु१ज ११६६ ल्याःया जीप दुर्घटना जुयाः न्याम्ह मनूत घटनास्थलय् हे सीगु जिल्ला प्रहरी ज्याकुथि गुल्मीया प्रहरी उपरीक्षक एसपी प्रविणलाल श्रेष्ठं जानकारी ब्यूगु दु ।

दुर्घटनाय् इस्मा गाउँपालिका ४ हुलया ६५ दँया डम्बर हितान, ३३ दँया शिव दर्लामी, ३० दँया बसन्त दर्लामी, ३३ दँया धनबहादुर अछामी व मालिका गाउँपालिका ५ या ८० दँया सुन्दरी थापा सीगु इस्मा प्रहरी चौकीया इञ्चार्ज मोहनलाल अधिकारीं जानकारी ब्यूगु दु ।

दुर्घटनाय् इस्मा गाउँपालिका ४ हुलया हे १९ दँया फर्सुराम थापा, २८ दँया सरस्वती दर्लामी व सहचालक २५ दँया कमल हितान घाःपाः जूगु खः । चालक बुद्ध बस्नेत सकुशल जूगु प्रहरीं जानकारी ब्यूगु दु । घाःपाः जूपिन्त वासः यायेगु नितिं गुल्मी अस्पताल यंकूगु दु ।

थौं शुक्रवाः सुथय् इस्मापाखें तम्घास वयाच्वंगु जीप दुर्घटनाय् लाःगु खः । जीपय् चालकलिसें ९ म्ह च्वनावःगु खः ।

दुर्घटनाय् लाःगु जीप सतकं थ्यंमथ्यं ४०० मिटर क्वय् कुतुंवंगु खः । चालक व सहचालकयात इस्मा प्रहरीं नियन्त्रणय् काःगु दु ।

दुर्घटना स्थलय् नेपाल प्रहरी, सशस्त्र प्रहरी, स्थानीय जनप्रतिनिधिपिं उद्धारय् जुयाच्वंगु इस्मा गाउँपालिका न्वकू विमला खत्रीं धाःगु दु ।

Categorized in दुर्घटना-अपराध