coved ad

गुन्हुया दुने ७ गुणां अप्वल मचापिन्त संक्रमण

नेवा: अनलाइन न्युज – ललेन्द्र शाक्य | २०७८ पौष ३०, शुक्रबार ११:५७:२९

नेपालय् कोभिड १९ या न्हूगु भेरियन्ट ओमिक्रोनया संक्रमण अप्वयाः वःबलय् संक्रमित जूपिं मचापिनिगु ल्याखय् बृद्धि जुजुं वःगु दु ।

स्वास्थ्य व जनसंख्या मन्त्रालयया लिपांगु गुन्हु (९ दिं)या तथ्यांक स्वयेगु खःसा संक्रमित जूपिं मचापिनिगु ल्याः ७ गुणां बृद्धि जूगु दु । २१ पुसय् झिदँसिबें क्वय् च्वंपिं ७ म्ह मचातय्के संक्रमण पुष्टि जूगु खः । तर, २९ पुसय् उगु ल्याः थाहाँ वनाः ४९ म्ह थ्यंगु दु ।

मचातय्के संक्रमणदर अप्वयाः वंगुया मू हुनिं हे खोपया पहुँचय् मचात मलाःगु बालरोग विशेषज्ञपिन्सं धाःगु दु ।

अथेला अस्पतालय् कोरोनाया शंकास्पद लक्षण दुपिं मचापिनिगु भर्ना दर अप्वयाः वयाच्वंगु दु ।

कान्तिबाल अस्प्तालया निर्देशक डा. अजित रायमाझी लिपांगु छुं दिं थुखे कोरोनाया थें हे लक्षण ज्वनाः वइपिं मचापिनिगु ल्याखय् बृद्धि जूगु धाःगु दु ।

बालरोग विशेषज्ञपिनिगु अनुमान दु कि ओमिक्रोनया लहरपाखें आपालं मचात संक्रमित जुइफु ।

आः कान्ति बाल अस्पतालय् १४ म्ह शंकास्पद मचापिन्त भर्ना यानाः तःगु दुसा निम्ह मचात कोरोना पोजेटिभ दु । तर, व ल्याः थ्यंमथ्यं झिन्हु न्ह्यः शंकास्पद छम्ह निम्हेसिके सीमित जूगु खः ।

अस्पतालय् भर्ना जूपिं शंकास्पद केसत झिदँसिबें क्वय् च्वंपिं मचात दु ।

डा. रायमाझीं धाःगु दु, ‘छुं दिं थुखे कोरोनाया लक्षण दुपिं मचात भर्ना जुइगु क्रम अप्वयाः वयाच्वंगु दु । शंकास्पद मचात थप जुजुं वःगुलिं चिन्ता थप जूगु दु ।’

डा. रायमाझीया कथं १४ गू शंकास्पद केसया पीसीआर परीक्षण जुयाच्वंगु दु र

मचापिन्सं कोरोना खोप कायेमखंगु हुनिं नं संक्रमित केसत अप्वयाः वःगु डा. रायमाझीया धापू दु ।

डा. रायमाझीं धाःगु दु, ‘थ्वसिबें न्ह्यःया लहरसिबें थ्व लहरय् मचापिन्त अप्वः संक्रमण यायेफु । ओमिक्रोन अप्वः संक्रामक जू धैगु खँ अनुसन्धानं क्यनेधुंकूगु दु । उकी नं जिमिसं १२ दँ क्वय् च्वंपिं मचापिन्त कोरोना खोप बिइफयाच्वंगु मदु ।’

बालरोग प्रतिरोध व बाथजन्य रोग विशेषज्ञ डा. धर्मागत भट्टराई नं ओमिक्रोन अप्वः संक्रामक जूगु हुनिं मचापिन्त जोगेयायेमाःगु सुझाब ब्यूगु दु ।

डा. भट्टराई नं धाःगु दु, ‘मेमेगु भेरियन्टसिबें ओमिक्रोन अप्वः संक्रामक जूगु हुनिं आपालं मचापिन्त संक्रमण पुष्टि जुइफु । तर आःतक अध्ययनं आपालं गम्भीर याःगु क्यंगु मदुनि ।’

मचातय्के थुकिया लक्षण गुकथं सिइकेगु ?

सरकारं मचापिन्त संक्रमणपाखें बचेयायेगु नितिं स्कूलत बन्द यायेत निर्देशन ब्यूगु दु । तर, छेँय् नं अभिभावकं मचापिन्त संक्रमणपाखें बचेयायेगु नितिं जनस्वास्थ्यया मापदण्ड पालना यायेमाःगु विज्ञपिनिगु सुझाब दु ।

संक्रमणपाखें मचापिन्त बचेयायेत दकले महत्वं जाःगु भूमिका अभिभावकपिनिगु जुइगु धासें डा. भट्टराई नं अभिभावकं विशेष सतर्कता छ्यलेमाःगु सुझाब ब्यूगु दु ।

मचापिंके सेखँ मुसु वःगु, सासः ल्हायेबलय् सः वःगु, नसा नयेगुलि मन मदूगु, सामान्य ज्वरोथें जाःगु लक्षण ज्वनाः अस्पताल थ्यंकूगु दु । तर, उगु सामान्य लक्षण खः । आः मचापिंके च्वय् च्वंगु श्वासप्रश्वास प्रणाली न्हाय्, ककु लिसेंया अंगय् इन्फेक्सन जूपिंके संक्रमण खनेदूगु डा. भट्टराई नं धाःगु दु ।

मचापिन्सं बांलाक्क नसा नःगु मदु, सासः याकनं याकनं ल्हायेगु यानाच्वंगु दु, म्हितेगुलि मन तःगु दु, मुसु वा ज्वरो दुसा चिकित्सकपिनिगिु सल्लाह कायेमाःगु व इलय् हे परीक्षण यायेमाःगु डा. भट्टराईया सुझाब दु ।

श्वासप्रश्वासया गति याकनं जुइगु, कोखा हानेजुइगु, मचात शिथिल जुइगु, अक्सिजन लेबल ९३ सिबें क्वय् कुहाँ वइगु, मेय्या भाग वचुसे च्वनीगुथें जाःगु लक्षण खनेदःसा तुरुन्त हे अस्पताल यंकेमाःगु डा. भट्टराईया सुझाब दु । इलय् हे अवस्था सिइकेफत धाःसा उपचार यायेत सहज जुइगु डा. भट्टराईया धापू दु ।

Categorized in राष्ट्रिय