zero media family planning adv

गुथि आन्दोलनया न्हि लाकाः असार ४ गते किपा ब्वज्या व दीप प्रज्ज्वलन

नेवा: अनलाइन न्युज – Rakesh Maharjan | २०७७ आषाढ २, मंगलबार १७:०२:२४

येँ – सरकारं गुथि विधयेक हःगु विरोधय् जूगु गुथि आन्दोलन असार ४ गते दच्छि पूवनेत्यंगु दु । गुथि आन्दोलन दच्छि पूवंगु न्हि लाकाः राष्ट्रिय पहिचान संरक्षण संयुक्त संघर्ष समितिं किपा ब्वज्या व उखुनु बहनी मत च्याकेगु (दीप प्रज्ज्वलन)या ज्याझ्वः तःगु दु ।

गुथि आन्दोलनया मर्म पूमवंनी, खबरदारी ल्यना हे च्वंगु दनि’ धइगु नारा ज्वनाः संघर्ष समितिं असार ४ गते न्हिनसिया १ः३० इलय् माइतीमण्डलय् किपा ब्वज्या यायेत्यंगु दु ।

असार ४ गते हे बहनिसिया ७ः३० ताः इलय् माइतीमण्डलय् मुनाः मत च्याकेगु ज्याझ्वः नं संघर्ष समितिं तःगु दु । थःगु एकता न्ह्यब्वयाः सरकारयात खबरदारी यायेकथं थःथःगु छेँ, चुक, ननि, बहाः, देगः आदि थासय् नं मत च्याकेत संघर्ष समितिं सर्वसाधारण सकलसित आह्वान नं याःगु दु ।

थौंकन्हय् न्यनाच्वंगु कोरोना महामारीयात बिचाः यासें निगुलिं ज्याझ्वलय् सामाजिक दुरी कायम यानाः सचेततापूर्वक ब्वति कायेत समितिं इनाप याःगु दु ।

लुमंकेबहःजू,  गुथि आन्दोलनया हुनिं वंगु दँया असार १० गते आधिकारिक गुथि विधयेक लित कायेत सरकार बाध्य जूगु खः । आन्दोलनया हुनिं सम्पदा पुनःनिर्माण व सांस्कृतिक गुथिया लागाय् न्हापासिबें आपाः सक्रियता व बजेट विनियोजन नं जूगु खः ।

 

Categorized in नेवाः