nepal investment baink

गुथि आन्दाेलनया उपलब्धियात कयाः संवाद व भर्चुअल विचार गोष्ठी जुइगु

नेवा: अनलाइन न्युज | २०७७ आषाढ २, मंगलबार १४:३७:३६

येँ – सरकारं हःगु गुथि विधेयकविरुद्धया आन्दोलन जूगु असार ४ गते दच्छि पूवनेत्यंगु दु । आन्दोलनया लुमन्ति अले दच्छिया अवधिदुनेया थुकिया उपलब्धियात कयाः संवाद व भर्चुअल  विचार गोष्ठी जुइत्यंगु दु ।

गुथि विधेयकविरुद्ध मंकाः संघर्ष समितिं असार ४ गते न्हिनसिया ४ ताः इलय् भर्चुअल विचार गोष्ठी यायेत्यंगु दु । उगु विचाः गोष्ठीइ नेवाः न्ह्यलुवाः मल्ल के. सुन्दर व वरिष्ठ अधिवक्ता पूर्णमान शाक्यं गुथि विधेयकया आन्दोलनयात कयाः थःथःगु विचार न्ह्यब्वयेत्यंगु दु ।

समितिं थुगु गोष्ठीइ ब्वति कायेत सकलसिन इनाप नं याःगु दु ।

अथे हे, नेवाः जागरण मञ्चया इनापय् गुथि आन्दोलनया लुमन्ति व उपलब्धि विषयक संवाद ज्याझ्वः जुइत्यंगु दु ।

कन्हय् (असार ३ गते) न्हिनसिया ४ ताः इलय् थ्व संवादया प्रत्यक्ष प्रशारण नेवाः युट्युबया फेसबुक पेजपाखें नं जुइत्यंगु दु ।

थुगु संवादय् गुथि विधयेक विरुद्ध आन्दोलनया कजि नेवाः न्ह्यलुवाः डा. महेशमान श्रेष्ठ, नेवाः न्ह्यलुवाः मल्ल के. सुन्दर व उपत्यका सडक विस्तार पीडित संघर्ष समितिया कजि सुमन साय्मिपिंसं आन्दोलनयात कयाः थःथःगु विचार प्वंकादी ।

थ्व ज्याझ्वःया पवित्र कसाःनं न्ह्याकादीत्यंगु दु ।

 

Categorized in नेवाः