zero media family planning adv

गुज्वःगु पापं पुन झीत...!!! (चिनाखँ)

– रिदेन महर्जन

किपू–१, ह्वाकुँचा

येँ खाली ततःखागु छेँ
वन कंक्रीटया ततःखागु
जंगलं छेँ मुनाच्वंगु थाय् थ्व
गन मदुगु थनं यचूगु लकस
खुशी जवंखवं स्वःसां फोहारया फोहर
लँय् वंसां धूया धू जक ब्वइगु थाय्
येँ धाये नं मल्वय् धुंकल  आः  
फोहारया दुंगुर मुनाच्वंगु थाय् ।।

सभ्य मनूत तनावंगु थाय्
मानवीयता नं न्हनावंगु थाय्
लँय् जूसां पलाः तये थाकूगु
सहरया गल्ली दुने तनाच्वंगु
मानवीय सभ्यता, न्ह्याथाय् स्वःसां
कुसंस्कृतिं कय्च्याना च्वंगु थाय्
छु याये अहो ! उकुस–मुकुस थन
सासः ल्हाये थाकु यचूगु लकस मदया ।।

झी अजा–अजिं स्वना थकूगु सहर
थौं झीपिं हे विस्थापित जुइगु
ई नं बुलुहुँ वयाच्वंगु ताल जितः
उफ ईलं गुज्वःगु कासा म्हितल झीतः
उलि मच्छि द्यः धकाः भाःपिया
पुजाआजा याना जात्रापात्रा  याना
द्यः धकाः भाःपिया कल्याण याइगु भाःपिया
भ्वय् नया धिमे थाना प्याखँ ल्हुया
थौं झीतः हे पितना छ्वइगु जुयाच्वन
गय् गथे जुल थौं हाय् ।।

झीगु स्वनिगः लागाय् थौं झीपिं
बिस्थापित जुइन गथे जुया जुल !
द्यःपिन्त नं न्ह्याक्वः पुजा यानानं
छुं लगेमजुल छु यानागु पापं पुनं झीतः ।।