zero media family planning adv

गुगु कथं व छाय् हनेत्यंगु दु झिक्वःगु नेवाः एकता दिवस ?

नेवा: अनलाइन न्युज | २०७६ मङ्सिर २१, शनिबार १५:०७:००

थ्व हे वइगु ने.सं. ११४० पोहेलाथ्व नवमि पुष १९ गते शनिबाः झिक्वःगु नेवाः एकता दिवस हने त्यनागु खँ सकसितं कना च्वना । नेवाः एकता दिवस नेवाः स्वायत्त राज्य मंका संघर्ष समितिया ग्वसालय् जुयावयाच्वंगु खःसां वंगु दँ निसें नेवाः देय् दबुया संयोजनय् नेवाः स्वायत्त राज्य मंका संघर्ष समितिइ दुथ्यानाच्वंगु १३ घटक व मेगु थीथी खलः पुचः दुथ्याकाः ग्वसाः खलः निस्वंगु जुल । वंगु दँय् यलय् नेवाः एकता दिवस हंगु हुनिं नेपालभाषा मंका खलःया नेतृत्वय्  यलया थीथी जातीय खलः पुचः दुथ्याःगु मूल व्यवस्थापन समिति निस्वनाः ज्या न्ह्याकुगु जुल । थुगु दँय् नं झिक्वःगु नेवाः एकता दिवस हनेगु तयारी यानाच्वनागु ज्याझ्वःलय् नेवाः देय् दबुया संयोजनय् थीथी खलः पुचःया मुँज्या च्वनागु जुल । थुगु मुँज्या च्वने न्ह्यो नेवाः स्वायत्त राज्य मंका संघर्ष समितिइ दुथ्याःगु घटकतय्गु मुँज्या च्वनाः सामान्य समझदारी दयेकागु खँ नं थन न्ह्यथनाच्वनागु जुल । थ्व हे झ्वलय् नेवाः एकता दिवस ज्याझ्वः व वर्तमान राजनीतिया खँय् संघर्ष समितिया अवधारणा क्वय् न्ह्यथना कथं दुगु नं सकलसित कना च्वना ।

१) नेवाः एकता दिवसया अवधारणा

      संघीय लोकतान्त्रिक गणतन्त्र नेपाःया दुने नेवाः स्वायत्त राज्य सुनिश्चित यायेगु हे नेवाः स्वायत्त राज्य मंकाः संघर्ष समितिया मू आज्जु खः । थ्व आज्जु पुवंकेया निंतिं संघर्ष समितिं नवमि प्वहेला थ्व , ११३० कुन्हु दशरथ रंगशालाय् लखंलख नेवाःत मुनाः नेवाः स्वायत्त राज्य घोषणा सभा यानाः नेवाःतय्गु माग व अवधारणा सार्वजनिक यासें संविधान सभा, राजनैतिक दलया नापनापं सकल सरोकारवालातय्गु ध्यानाकर्षण याःगु जुल । उगु हे दँय् थिमिया बोडेय् नेवाः राष्ट्रिय राजनीतिक सम्मेलन जुल व उगु सम्मेलनं नेवाः दुने परम्परानिसें दयावयाच्वंगु जातीय् क्षेत्रीय साँस्कृतिक धार्मिक अनेकता व असमानताया विरुद्ध पोहेलाथ्व नवमिया न्हि लाकाः नेवाः एकता घोषणा यायेगु क्वःछ्यूगु जुल । थ्व हे संघर्षया ऐतिहासिक न्हि यात लुमंकाः दँय्दसं नवमि प्वहेला थ्व कुन्हु नेवाः एकता दिवस हना वयाच्वंगु जुल । नेवाः दुनेया अनेकताय् एकता हयेगु तातुनाः सकल नेवाः छवाः खः धइगु घोषणा न्हापांगु नेवाः एकता दिवसय् जूगु खँ यात नं लुमंकुसें झिक्वःगु नेवाः एकता दिवस हने त्यनागु जुल । नेवाः स्वायत्त राज्य प्राप्तिया निंतिं झी नेवाः सकल छधिइ छप्पं जुयाः न्ह्याःवनेगु व नेवाः सरोकारया खँ थ्वयेकेगु थ्व दिवसया मू तातुना खः । नेवाः एकता दिवस हनावयाच्वंनागु भ्mवलय् राज्य सत्तां निरन्तर रुपं नेवाःतय्त भूमिपाखें विस्थापित यायेत जुयाच्वंगु षडयन्त्र, व्यापार लजगापाखें नेवाःतय्त विस्थापित यायेत जुयाच्वंगु षडयन्त्र, भाषा सँस्कृति सम्पदा न्हंकेत जुयाच्वंगु षडयन्त्र आदिया विरुद्ध एकताबद्ध जुइ माःगु आवश्यकता दु । थौंकन्हय् झीसं राज्य सत्ताया षडयन्त्र सडक विस्तार, फास्ट ट्रायक, बाह्य चक्रपथ, स्मार्ट सिटी, गुथि विधयेक, सम्पदाया व्यापारिकरणया रुपय् खनावयाच्वनागु दु । थुकिया विरुद्ध सचेत, एकताबद्ध संघर्ष मयायेगु खःसा नेवाः जातिया अस्तित्व समाप्त जुइगु स्थिति वयेफु । उकिं थौं या इलय् नेवाः एकता दिवस नेवाः जागरण दिवस कथं हनेमाःगु आवश्यकता दु ।

२) राजनैतिक अवधारणाया खँय्

क) संघर्ष समितिया मू आज्जु नेवाः स्वायत्त राज्य सुनिश्चित जूगु संविधान निर्माणया निंतिं संघर्ष यायेगु खः । तर वंगु संविधानय् नेवाः स्वायत्त राज्य सुनिश्चित मजूगु व अन्तरिम संविधानय् ब्यवस्था जूगु आदिवासी जनजाति व उत्पीडित समुदायया अधिकार तकं क्वपालेगु ज्या जुल । उकिं थ्व संविधानयात असहमति क्यनाः नेवाः स्वायत्त राज्यया निंतिं संघर्ष ह्याकेमाःगु दु । छुं दँ न्ह्यः सरकार पाखें संसदय् न्ह्यब्वःगु संविधान संशोधन विधयेकय् नं झीगु माग दुमथ्याःगुलिं झीसं असहमति क्यनाः ज्याझ्वः न्ह्याकावया च्वनागु सकसिनं सिउगु हे खँ खः । थ्व संशोधन विधयेक परिमार्जन यानाः पहिचान दुगु नेवाः स्वायत्त राज्य सुनिश्चित यायेमाः धयागु झीगु माग खः । नेवाः व तामांग बाहुल्य लागा कःघाना ३ नं प्रदेश दयेकुगु खःसां प्रदेशया नां नेवाः ताम्सालिंग प्रदेश जुइमाःगु झीगु तात्कालिक माग खः । प्रदेशया नां सिबें झी अधिकारया खँय् अप्व सचेत जुइमाःगु खँ नं थन न्ह्यथनाच्वना ।

ख)आन्दोलनया झ्वलय् नेवाः नापं आदिवासी जनजाति व राज्य दथुइ जूगु गुंगू (९) वुँदे सहमति व सम्झौता व इलय् ब्यलय् आदिवासी जनजाति व भाषाभाषीत नाप जूगु थीथी सहमति व सम्झौता कार्यान्वयन याकेत आःया संविधानयात संशोधन वा पुनर्लेखन यानाः अधिकार सुनिश्चित यायेगु निंतिं न्ह्याः वनेगु नं क्वः ज्यूगु जुल ।

ग)न्हूगु संविधान कार्यान्वयन याइगु झ्वलय् संविधानयात उपयोग यानाः गुलि फु उलि अप्वः नेवाः अधिकार कायेगु निंतिं दवावमूलक ज्याझ्वः न्ह्याका वनेगु नं क्वःज्यूगु जुल ।  

२)संगठनया खँय्

संघर्ष समितियात अझ तःजिक न्ह्याका यनेमाःगु खँय् फुक्क धयाथें घटक खलकं सुझाव वःगु जुल । थ्व खँया लिधंसाय् संघर्ष समिति झिंस्वंगू (१३) घटकया संयुक्त मोर्चा कथं जक मखु नेवाः स्वायत्त राज्यया पक्षधर सकल नेवाः ब्यक्ति व खलः पुचः दुथ्याकाः केन्द्रिय स्तरया स्वतन्त्रगु संघर्षशील संगठन कथं न्ह्याः वनेगु नितिं पुर्नसंरचना यानाः अझ क्वातुक न्ह्याः वनेगु क्वःज्यूगु जुल । समस्या गुलि अप्वइ एकता उलि हे क्वातुकेमाःगु आवश्यकता दइ । तर राज्य सत्तां आदिवासी जनजाति लगायत नेवाः एकता कमजोर यायेगु षडयन्त्र यानाच्वंगु दु । नेवाः स्वायत्त राज्य मंका संघर्ष समितिया सांगठनिक निरन्तरता व क्रियाशिलता कमजोर जुयाच्वंगु दु । उकि नेवाः स्वायत्त राज्यप्रति प्रतिबद्ध संघ संस्थाया संस्थागत प्रतिबद्धता कयाः नेवाः स्वायत्त राज्य मंका संघर्ष समिति पुनरगठन यानाः नेवाः एकता व संघर्षयात अझ अप्व क्वातुकेमाःगु आवश्यकता दु । न्हूगु नेतृत्वया विकास जुइमाःगु दु ।

३)झिक्वःगु नेवाः एकता दिवसया तयारीया नितिं अवधारणा

(क)नेवाः स्वायत्त राज्य प्रति प्रतिबद्ध दुपिं दक्व खलः पुचःया भेला तयाः नेवाः स्वायत्त राज्य मंका संघर्ष समितिया पुनरगठन यायेमाःगु आवश्यकता दुसां तबि नं एकता दिवस न्ह्यो समयया कारणं सम्भव मजुइगु जूगुलिं आःयात १३ घटकय् मेगु खलः पुचः नं समाबेश यानावनेगु पाय्छि जुइ । उकिया नितिं संस्थागत प्रतिबद्धता पौ कायेगु ज्या न्ह्याका वनेगु पाय्छि जुइ ।

(ख) झिक्वःगु नेवाः एकता दिवस पोहेलाथ्व नवमि , पुष १९ गते शनिबाः येँया असनय् खुल्ला सभा यानाः हनेगु व उकिया नितिं न्युरोड भुगोलपार्कय् मुनाः जुलुस न्ह्याकेगु जुल । थौंया मुज्यां ज्याझ्वःयायेगु जुल ।

(ग) नेवाः एकता दिवसय् ब्वति कायेत इनाप यानागु पर्चा मंसिर २४ गते पिथनाः वितरण ज्या न्ह्याकेगु । थ्व दत्थुइ नेवाःतय्गु छुं नं ज्याभ्mवः जुल धाःसा अन महत्व बियाः पर्चा इनेगु जुइ ।

(घ) थीथी खलः पुचःयात ब्वनापौ पुष ५ गते निसें १५ गते तक दुने इने क्वचायेकेगु ।

(ङ) नेवाः न्ह्यलुवापिनिगु बृहत भेला यानाः पुष ५ गते न्हिनसिया १ बजे नेपाः ब्यान्क्वेटय् अन्तरक्रिया ज्याभ्mवः यायेगु प्रस्ताव यानाच्वना । थ्व ज्याभ्mवःया संयोजन समाजवादी नेवाः संघं यायेगु प्रस्ताव यानाच्वना । विशिष्ट नेवाः न्ह्यलुवापिन्त ब्यक्तिगत कथं नापलायेगु ज्या पुष ३ गते तकया दुने क्वचायेकेगु जुइ, थुकिया संयोजन नेवाः जागरण मञ्च व समाजवादी नेवाः संघ यायेगु कथं प्रस्ताव यानाच्वना ।

(च) नेवाः एकता दिवसया प्रचार ब्यानर म्होतिं १०० पा दयेकाः नेवाः चोक बस्तिइ यखायेगु , थुगु ब्यानर यखायेगु ज्या पुष १२ तकया दुने क्वचायेकेगु । थ्व ज्याया संयोजनया नितिं नेपाः राष्ट्रिय परिषद्या संयोजनय् दक्व घटकया मुँज्या च्वनाः योजना दयेकेगु कथं प्रस्ताव यानाच्वना ।

(छ) मंसिर २८ गते निसें पुष १५ गते तक थीथी लागाय् सहलह ज्याझ्वः न्ह्याकेगु 

सहलह ज्याझ्वः न्युनतम न्ह्याकेमाःगु लागा थुकथं प्रस्ताबित यानागु जुल । संयोजन याइगु खलः पुचःया नां संशोधन यायेफइगु जुल । सहलहया मू विषय तये नं फइ वा मतसें नेवाः जागरण व एकताया विषय जक तयाः सहलह नं यायेफइ ।

( झिक्वःगु नेवाः एकता दिवस ग्वसाः खलः नं पित ब्यूगु अवधारणा पौं )

Categorized in बिचा: