२०७२ जेठ ११, सोमबार १३:३४:३९

गुगलया अन्तर्राष्ट्रिय कन्फ्रेन्स वइगु मे २८ निसें जुइत्यंगु दु । थुगु कन्फ्रेन्सय् गुगलं थःगु एन्ड्रोइड ६.० या घोषणा नं यायेत्यंगु दु । थ्वलिसें गुगलं छगू न्हू कथंया फोटो सेयर याइगु एप्स् नं न्ह्यब्वइगु जूगु दु गुगु गुगल प्लसया नेटवर्कय् लाइगु धाःसा जुइमखु । थुगु सर्भिसपाखें प्रयोगकर्तातयसं फेसबुक व ट्विटरय् थें सामाजिक संजालय् फोटो शेयर यायेफइगु सुविधा दइ । गुगलपाखे आपालं थुज्वःगु न्ह्याइपुगु खँत दु गुगु झी आपाःसिनं मस्यू । आः उमिबारे छुं छुं सीके ?

१. चकलेट व मिठाइपाखें एन्ड्रोइडया नां

एन्ड्रोइड अपरेटिङ सिस्टमय् थःत न्हापांगु थासय् तयातःगु दु । गुगलया एन्ड्रोइडया नांयात कयाः आपाःसिया मनय् धौबजि वालेफु, थुकिया नां छाय् न्ह्याबलें चकलेट वा मिठाइपाखें जुइ धकाः । गुगलया छम्ह कर्मचारी र्याण्डल सराफाया कथंं थ्व टिमवर्कया हुनिं खः । थ्व बारे आधिकारिक धापू पितवःगु मदुनि । एन्ड्रोइडं थःगु अपरेटिङ सिस्टमया नांयात छसिकथं अंग्रेजी अल्फाबेट

ABCD…कथं तयातःगु दु । आःतक वःगु एन्ड्रोइड एप्लिकेशनत  Cupcake, Donut, Eclair, Froyo, Gingerbread, Honeycomb, Ice Cream Sandwich, Jelly Bean, KitKat व नकतिकि जक Lollipop


२. गुगल डूडल

गुगला न्हापांगु डूडल ‘बर्निङ म्यान फेस्टिभल’या निंतिं सन् १९९८ स दयेकूगु खः । थुकिं गुगलया सर्च पेजयात हे हीकाबिल । लिपा मे २०१२ निसें गुगलं थःगु डूडलयात न्हूगु रुप बिल, छगू गेम कथं । थ्व न्हापांखुसिइ खः कि प्रयोगकर्तातय्सं गुगलया डूडलनाप नं म्हिते जिल । थ्व एबअ mबल नांया भिडियो गेमया ३० दँ पूवंगु लसताय् दयेकूगु खः । उगु हे दँय् गुगलं थःगु न्हापांगु एनिमेटेड (कार्टुन) डूडल अपडेट यात । थ्व जोन लेननया ७० गू जन्मन्हिया लसताय् दयेकूगु खः ।

३. छगू मिलियन डलरय् मीत्यंगु गुगल

गुगलया न्हापांगु इलय् थुकिया संस्थापक सर्जी ब्रिन व लैरी पेजं गुगलयात मीत स्वःगु जुयाच्वन । उमिसं एक्साइट नांया छगू कम्पनीया सिईओयात नाप नं लायेधुंकूगु जुयाच्वन ।  उमिसं गुगलयात छगू मिलियन डलरय् मीत स्वःगु जुयाच्वन । तर उगु कम्पनीं केवल ७,५०,००० डालर जक बीगु धासेंलि थ्व मीज्या मजुल धाःसा लिपा वनाः गुगल विश्वव्यापी व तच्वकं नां जाल ।


४. गुगलया टिम

नोभेम्बर १९९९ स गुगलं थः कर्मचारीतयत नँसा नकेत छम्ह शेफ तल । चार्ली अइयर्स नांया उम्ह शेफं न्हापां ४० म्ह कर्मचारीतय् निंतिं जक खाना दयेकीगु खः । लिपा सन् २००६ तक थ्यंबलय् चार्ली गुगलयात त्वःताबिल व उबलय् तक वंं थःगु प्यंगू टिमया १५० शेफपाखें प्यद्वः मनूतय् लागि खाना दयेकीम्ह जुइधुंकूगु खः ।

५. गुगलं न्यानाकाःगु कम्पनी

गुगलया छगू न्ह्याइपुगु खँ छु धाःसा थ्व आपालं न्हूगु चिचीधंगु कम्पनीयात न्यानाः थःगु कम्पनीइ दुथ्याकाच्वंगु दु । सन् २०१० स गुगलं वाःपतिकं छगू छगू कम्पनीइ लगानी थप यानावन । थुकिया सुरुवात गुगल एनर्जीपाखे जूगु खः । अन लिपा नेक्स्ट एरा एनर्जी रिसोर्स व अनं ल्यू ग्लोब आइपी सोल्युशनलिसें आपालं कम्पनी न्यानाकाल । एन्ड्रोइड, मोटोरोला (थुकियात आः लेनाभों न्यायेधुंकूगु दु)। क्विकअफिस आदि कम्पनी न्यानाः थःगु कम्पनीं दुथ्याकाः यंकल ।

६. गल्तीं जूगु नां

गुगल सर्च इन्जिनया नांया स्पेलिङ वया संस्थापकपिनि गल्तीं लाःवंगु खः । धात्थें ला संस्थापकपिंसं GOOGOL नां तयेगु क्वःछ्यूगु खः तर स्पेलिङ मिस्टेक जुयाः थुकिया नां GOOGLE जुयाबिल ।

७. गुगलया न्हापांगु ट्विट

म्हो जक मनूतयसं स्यूकि गुगलं थःगु ट्विट कम्प्युटरया भाषा ० व १ छ्यलाः बाइनरी भाषाय् याःगु खः । व ट्विट थथे दु ।

“I’m 01100110 01100101 01100101 01101100 01101001 01101110 01100111 00100000 01101100 01110101 01100011 01101011 01111001 00001010.”

थुकिया अंग्रेजीइ  im feeling lucky'  खःसा गुगलया सर्च बटन लिक्कसं नं थ्व हे खँग्वः छ्यलातःगु खंकेफइ । थुकिइ क्लिक यायेवं फुक्क गुगल डूडलबारे सीकेफइ ।


८. गुगल मेल अर्थात् जीमेल

गुगलया ईमेल सर्भिस जीमेल १६ डिसेम्बर २००५ स लन्च जूगु खः । थुकियात ५० अलग अलग भाषाय् लन्च याःगु खः । जीमेलया आइडिया राजन सेठ नांयाम्ह मनूया खः गुम्ह गुगल कम्पनीइ जागिर नयेत अन्तर्वार्ता ब्यूवंबलय् वं ब्यूगु खः । थुगु आइडियात लिपा पाल बुचें आःया आकार बिल । न्हापा ला जीमेल गुगलया कर्मचारीतय् निंतिं जक दयेकूगु खःसा लिपा थुकियात विश्वव्यापी प्रयोगकर्तातय् निंतिं घोषणा याःगु खः ।

९. न्हापा स्क्रिनया खवय् गुगल लोगो

सर्च इन्जिनमध्ये गुगलया डिजाइन दकलय् बांलाःगु जुइफु । स्क्रिनया दथुइ गुगलया सर्चबार व उकिया च्वय् गुगल च्वयातःगु लुइ । तर न्हापांगु दिंनय् गुगलया थ्व लोगो स्क्रिनया खवय् पाखे दइगु खः । गुगलं थुकियात ३१ मार्च २००१ निसें दथुइ हःगु खः ।