kendriya tathyank bhibhag ad

गुक्वःगु किपू नगरव्यापी वडास्तरीय बास्केटबल कासा शनिवाः उलेज्या

नेवा: अनलाइन न्युज – ललेन्द्र शाक्य | २०७८ भाद्र २५, शुक्रबार ०८:२७:४५

कीर्तिपुर बास्केटबल एसोसिएसनया ग्वसालय् ऐतिहासिक नगर किपू नगरपालिका दुने दँय् दसं ग्वसाः ग्वयाः वयाच्वंगु अन्तर वडास्तरीय बास्केटबल कासा थुगु दँ नं जुइगु जूगु दु ।

वइगु यंलागा पंचमीनिसें द्वादसीतक अर्थात् भाद्र २६ गतेनिसें असोज २ गतेतक किपूया १० वडाय् च्वंगु बास्केटबल कभर्ड हलय् उगु कासा जुइगु जानकारी ग्वसाः खलः कीर्तिपुर बास्केटबल एसोसिएसनया नायः विकु महर्जनं बियादीगु दु ।

किपू नगरपालिका व कीर्तिपुर बास्केटबल एसोसिएसनया मंकाः ग्वसालय् वंगु दँय् थें थुगु दँय् नं जुइत्यंगु उगु कासाय् मिजंपाखे किपूया १ निसें १० वडातक फुक्क वडापाखें प्रतिनिधित्व यासें १२ गु टिम सहभागी जुइगु जानकारी एसोसिएसनया नायः महर्जनं बियादीगु दु ।

अथेहे, उगु कासाय् मिसापाखे न्यागू वडाया टिमं सहभागिता प्वंकीगु जानकारी बिसें ग्वसाः खलः नायः विकु महर्जनं कासा लिग कम नकआउटय् म्हितकेगु जानकारी नं बियादीगु दु । नायः भाजु मजर्हनं विजेता व उपविजेता टिमयात नगद, ट्रफी, मेडल व दसिपौ लःल्हायेगु जानकारी नं बियादीगु दु ।

कीर्तिपुर बास्केटबल एसोसिएसनं किपू लागाय् बास्केटबल विकासया नितिं वंगु न्यादँ न्ह्यःनिसें थीथी कासात संचालन यासें वयाच्वंगु दुसा कासामि प्रशिक्षण ज्याझ्वः व राष्ट्रिय कासाय् नं किपूपाखें सहभागिता प्वंकाः वयाच्वंगु दु ।

अथेहे, एसोसिएसनं भविष्यय् नं किपू लागाया बास्केटबल विकासया नितिं थुज्वःगु आपालं ज्याझ्वःत ग्वसाः ग्वयाः वनेगु आज्जु दूगु जानकारी नं एसोसिएसनया नायः विकु महर्जनं बियादिल ।

शनिवाःनिसें न्ह्याइगु गुक्वःगु संस्करणया किपू नगरव्यापी वडास्तरीय मिजं व मिसा बास्केटबल कासा २०७८ उलेज्या ज्याझ्वः वइगु भाद्र २६ गते शनिवाः सुथय् ८ ता इलय् किपूया १० वडाय् च्वंगु बास्केटबल कभर्ड हलय् जुइगु जूगु दु । उलेज्या ज्याझ्वलय् कासालिसें सांगितिक कन्सर्ट ज्याझ्वः नं जुइगु जानकारी ग्वसाः खलकं ब्यूगु दु ।

Categorized in कासा