nepal investment baink

गिरिजाप्रसाद कोइरालाय १४ क्वःगु स्मृति दिवस थौं

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व एकादसी (२०८० चैत्र ७) बुधवाः

नेपाली कांग्रेसया पूर्व सभापति लिसें पूर्व प्रधानमन्त्री गिरिजाप्रसाद कोइरालया १४ क्वःगु स्मृति दिवस पार्टीया भ्रातृ लिसें शुभेच्छुक संस्थां थौं बुधवाः देय्या थीथी थासय् थीथी ज्याझ्वः यानाः हंगु दु ।

देसय् जुयाच्वंगु माओवादी सशस्त्र द्वन्द्व अन्त्य यायेत महत्वं जाःगु भूमिका निर्वाह याःम्ह मदुम्ह नेता कोइरालाया योगदानयात स्मरण यासें ज्याझ्वः याःगु दु । सशस्त्र द्वन्द्वय् वनाच्वंगु पुचःयात शान्तिपूर्ण राजनीतिया मूलधारय् हयेत कोइरालां नेतृत्वदायी भूमिका निर्वाह याःगु खः ।

वि.सं. २०५९ असोज १८ गते तत्कालीन जुजु ज्ञानेन्द्र शाह नं जननिर्वाचित प्रधानमन्त्री शेरबहादुर देउवायात अपदस्थ यानाः थः अनुकूलया प्रधानमन्त्री नियुत्तः यायेधुंकाः राजतन्त्रप्रति जनताया आस्था म्हो जूगु खः । वधुंकाः जूगु आन्दोलनया नेतृत्व गिरिजाप्रसाद कोइरालां हे याःगु खः । वि.सं. २०६१ माघ १९ गते दलयात प्रतिबन्ध तसें जुजु ज्ञानेन्द्र थःहे मन्त्रिपरिषदया नायः जुइधुंकाः कोइरालां फुक्क राजनीतिक दलयात छथाय् हयाः पूर्ण लोकतन्त्रया पलिस्थाया नितिं आन्दोलनया नेतृत्व याःगु खः ।

पूर्व प्रधानमन्त्री कोइरालाया हेनेतृत्वय् वि.सं. २०६३ बैशाख ११ गते जुजु ज्ञानेन्द्र आन्दोलनरत ७ गू दलया मार्गचित्र कथं विघटित प्रतिनिधिसभा पुनःस्थापना यायेत सहमत जूगु खः । आन्दोलन सुथां लायेधुंकाः कोइराला प्यक्वःगुखुसि देसया प्रधानमन्त्री जूगु खः । पुनःस्थापित प्रतिनिधिसभां वि.सं. २०६३ जेठ ४ गते जुजुया फुक्क अधिकार कटौती यासें आलंकारिक जुजुया रुपं ज्ञानेन्द्र शाहयात सीमित याःगु खः ।

नेता कोइरालाया हे नेतृत्वय् माओवादी जनसेनाया समायोजनलिसें ल्वाभः व्यवस्थापन जूगु खः । वया हे नेतृत्वय् ६ दशकसिबें ताःहाकःगु संविधानसभा निर्वाचन यायेगु कांग्रेसया संस्थापक नेता विपी कोइरालया म्हगस पूवंगु खः ।

प्यक्वःतक मुलुकया प्रधानमन्त्री जूम्ह नेता कोइरालां लिपांगु कार्यकालय् धाःसा कार्यवाहक राष्ट्राध्यक्षया कार्यभार तकं कःघाःगु खः । वया हे नेतृत्वय् २०६५ जेठ १५ गते नेपालं २४० दँया इतिहास दूगु शाह वंशीय राजसंस्थाया अन्त्य जुयाः नेपाल संघीय लोकतान्त्रिक गणतन्त्रया रुपं स्थिापित जूगु खः ।

Categorized in राष्ट्रिय