nepal investment baink

गाजा क्षेत्रय् विस्थापितया शिविरय् आक्रमण : २९ म्ह सित

नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व चतुर्थी (२०८१ असार २६ गते) बुधवाः

दक्षिणी गाजाय् विस्थापितपिनिगु अस्थायी शिविरय् इजरायलं आक्रमण याःबलय् २९ म्ह मनूत सीगु दु ।

इजरायलं धाःसा थःपिनिगु आक्रमण विस्थापित जूपिन्त लक्षित मजुसे हमासया लडाकुपिंप्रति लक्षित जूगु जानकारी ब्यूगु दु ।

शरणार्थी शिविरय् आक्रमण जूगु जूसा उकिया जाँच यायेगु इजरायलं जानकारी ब्यूगु दु ।

हमासं संचालन याःगु स्वास्थ्य मन्त्रालयं धाःसा खान युनिसया पूर्वपाखे लाःगु अबसाना अल कबिरा गामय् च्वंगु अल आवदा स्कुलया गेड न्ह्यःने हवाई हमला जूगु खः । उगु थासय् युद्धपाखें विस्थापित जूपिनिगु अस्थायी शिविर दूगु खः ।

इजरायली सेनां धाःगु दु, ‘उगु थासय् ७ अक्टुबरय् इजरायलय् आक्रमण याःपिं अन दूगु खः व हमासया मिलिटरी विङ्गया दुजःपिन्त निशाना दयेकेगु नितिं सटिक प्रहार यायेगु ल्वाभः छ्यःगु खः ।’

७ अक्टुबरय् इजरायलय् हमासं आक्रमण याःबलय् १२ सय मनूत सीगु खःसा नेपाःया विपिन जोशीलिसें २५१ म्हेसित हमासं बन्धक दयेकाः गाजा क्षेत्रय् यंकूगु खः । उगु घटनालिपा इजरायलं हमासयात निमिट्यान्न यायेगु कसम नसें आक्रमण जारी याःगु दु ।

इजरायली सेनाया सैन्य कारवाहीयस आःतक ३८ हजारसिबें अप्वः मनूत सीधुंकूगु दुसा लखौं मनूत विस्थापित जूगु दु ।

आक्रमणया झ्वलय् छवाः न्ह्यः जक इजरायली सेनां अबासान अल कबिरा व खान युनिसया पूर्वी इलाका खाली यायेत आदेश ब्यूगु खः । वहे आदेश कथं अनं द्वलंद्वः मनूत बिस्थापित जूगु दु ।

Categorized in अन्तर्राष्ट्रिय