nepal investment baink

गाजाय् राहत हलंज्वलं ज्वनावंगु पुचःयात इजरायलया आक्रमण, ७ म्ह सित

नेवा: अनलाइन न्युज – ललेन्द्र शाक्य | ने.सं. ११४४ चिल्लागा नवमि (२०८० चैत्र २१ गते) बुधवाः

गाजाया युद्ध प्रभावितपिन्त खाद्यान्न व लः थ्यंकाः ग्वाहालि यानाः वयाच्वंगु संस्था वर्ल्ड  सेन्ट्रल किचनया कर्मचारीपिन्त आक्रमण जुयाः ७ म्ह सीगु दु ।

इजरायली सेनां याःगु उगु आक्रमण लिपा वर्ल्ड सेन्ट्रल किचनं ग्वाहालि यायेगु बन्द याःगु दु ।

इजरायलया प्रधानमन्त्री थःम्हं हे उगु घटनाया पुष्टि यासें सेनापाखें गल्ती जूगु स्वीकार याःगु दु ।

नसाज्वलं लिसेंया अत्यावश्यक राहत हलंज्वलं यंकाच्वंपिन्त आक्रमण जूगु व थः ७ म्ह कर्मचारीपिं स्याःगु वर्ल्ड सेन्ट्रल किचनं जानकारी ब्यूगु दु ।

बीबीसीया कथं इमित इजरायली सेनां हवाई आक्रमण याःगु खः । वर्ल्ड सेन्ट्रल किचनया कर्मचारीपिं स्वंगः गाडीइ दूगु खः । उगु स्वंगलं गाडी आक्रमणय् लाःगु खः । बीबीसीं सार्वजनिक याःगु घटनास्थलया किपातय् छगः गाडीया छतय् तप्वाःगु ह्वः खनेदूगु दु ।

इजरायलया प्रधानमन्त्री बेन्जामिन नेतन्यान्हुं इजरायली सेनाया गल्तीं गाजाय् निर्दोष मनू स्याःगु जानकारी ब्यूगु दु । वंयुद्धया झ्वलय् गुबलें गुबलें थुज्वःगु घटना जुइगु धासें आः हाकनं थुज्वःगु गल्ती दोहोरे मयायेगु प्रतिबद्धता प्वंकूगु दु ।

Categorized in अन्तर्राष्ट्रिय